Atez atekoaren gaineko batzarrak deitu dituzte San Pedron
Astelehenean da lehen batzarra, euskaraz, eta asteartean bigarrena, gaztelaniaz; biak, 19:00etan, Udal Aretoan Urtea bukatu baino lehen hondakinak atez ate biltzeko sistema Pasaia osora hedatu nahi du udal gobernu taldeak, eta gaur goizean, bide horretan egin behar duten hurrengo urratsaren berri eman dute udaletxean, Pasaiako alkate Amaia Agirregabiriak, San Pedroko alkateorde Jose Luis Sanzek eta Aztikerreko teknikari Susana Martinezek.
Astelehenean da lehen batzarra, euskaraz, eta asteartean bigarrena, gaztelaniaz; biak, 19:00etan, Udal Aretoan
Urtea bukatu baino lehen hondakinak atez ate biltzeko sistema Pasaia osora hedatu nahi du udal gobernu taldeak, eta gaur goizean, bide horretan egin behar duten hurrengo urratsaren berri eman dute udaletxean, Pasaiako alkate Amaia Agirregabiriak, San Pedroko alkateorde Jose Luis Sanzek eta Aztikerreko teknikari Susana Martinezek. Bi batzar informatibo deitu dituzte San Pedron datorren asterako. Euskaraz egingo dute lehenbizikoa, astelehenean, eta gaztelaniaz bigarrengoa, asteartea. Biak Udal Aretoan izango dira, 19:00etatik aurrera, eta bertara San Pedroko herritar guztiak daude deituta, Gran Sol kaleko 5 eta 6 zenbakietakoak eta Ricardo Arrillaga kelako 1 zenbakikoak barne. Batzarrak batez ere informatiboak izango direla aurreratu dute, baina ekarpenak jasotzeko aukera izango dela nabarmendu du batzarrak dinamizatuko dituen Aztikerreko teknikari Susana Martinezek. Bilketa, gauez San Pedroko alkateorde Jose Luis Sanzek bilketa gauez egingo dutela aurreratu du, «trafikoan eragina txikiagoa» izan dadin. Zintzilikarioak zurrunetan- San Pedro eta Arraunlari kaleak batzen dituzten pasabide estuetan- jarriko dituztela jakinarazi du, eta hiru lokal izango direla aurreratu: frontoiko zurruna estaligabean bat; Alkateordetzaren azpialdean bigarrena eta ikastola azpiko komun publikoa izandakoan hirugarrena. Azken hau ekarpen gune gisa ere erabiliko dute. Herritarren erantzunarekin «oso pozik» daudela esan du gaur goizeko agerraldian Agirregabiria alkateak, eta Pasaian birziklatze tasa urtebete eskasean – iazko irailaren 2 ezarri zuten Donibanen sistema berria- %32 izatetik %55 ingurura iritsi dela baieztatu du, Trintxerpe eta San Pedro sistema berrira batzeke. Horrez gain, Antxon eta Donibanen birziklatze tasa %85 ingurukoa dela jakinarazi du alkateak.
Batzarren aurkezpena
