Amaia Agirregabiria: "San Pedron eta Trintxerpen ere ongi egingo dugu"
Bihar merkatariekin egingo dituzten bi bilerak egiteke – eguerdiko 13:30ean eta 20:00etan bilduko dira Trintxerpeko alkateordetzan merkatari eta ostalariekin- bukatu ditu udalak atez atekoaren gaineko batzar informatiboak. Lehen lau batzarretako "balorazio erabat positiboa" egin du Amaia Agirregabiria alkateak, baina, bostgarren batzarrean jazo zirenengatik "atsekabea" agertu du.
Bihar merkatariekin egingo dituzten bi bilerak egiteke – eguerdiko 13:30ean eta 20:00etan bilduko dira Trintxerpeko alkateordetzan merkatari eta ostalariekin- bukatu ditu udalak atez atekoaren gaineko batzar informatiboak. Lehen lau batzarretako “balorazio erabat positiboa” egin du Amaia Agirregabiria alkateak, baina, bostgarren batzarrean jazo zirenengatik “atsekabea” agertu du.
Trintxerpeko azkeneko batzarra ezin izan zuten hasi ere egin, eta horregatik informazio jasotzera joan ziren herritarrei zuzendu zaie zuzenean alkateak: “Ezin izan dizuegu espero zenuten informazioa eman eta hori da nire egonezinaren arrazoia. Ez zegoen elkarrizketarako gogorik, kontsigna hutsalak nagusitu ziren, eta horren aurrean ezer gutxi egin ahal izan genuen”.
Alkatearen iritziz batzarra oztopatu zutenek “informazioren beldur” dira: “Egon zaitezke alde edo kontra, sistema izan daiteke gustuko edo ez, baina bilketa zertan datzan eta hori martxan jartzeko arrazoiak entzutea eragozten ari dena; informazio horren beldur dena; argumentu gutxi dituen seinale”.
Azken batzarrean gertatutakoa “aspaldi idatzitako antzezlana” izan zela iritzi dio alkateak, baina “gidoia idatzi dutenek” ez zirela bertan azaldu du Agirregabiriak. “Gidoilari horiek izan dute denbora soberan Udalak onartu bezala %70etik gora birziklatuko duen sistema bat aurkezteko”, jakinarazi du alkateak, baina “arazoaren funtsari muzin egin” diotela iritzi dio Agirregabiriak.
Bukatzeko, Donibanen eta Antxon egin antzera, bilketa berria ezarri eta gauzak ondo irtengo direla iragarri du alkateak: “Donibanen ongi egin dugu, Antxon ongi egin dugu. Eta San Pedron eta Trintxerpen ere ongi egingo dugu”.
