Behar soziokulturalak bultzatzeko zenbait erabaki hartu dituzte
Pasai San Pedroko Proisa Kulturgunearen itxieraren ondorioz, abiatutako prozesu parte hartzailearen ondorioak eta konpromisoak jakitera eman dituzte gaurkoan. Zentzu horretan, talde eragilea “poz pozik” agertu da udalak hartutako konpromisoekin eta “lehen pausoak” ematen hasi direla adierazi dute.
Horiek horrela, “batzarretatik atera dugun ondorio nagusia izan da gure barrutian Proisa edo Proisaren gisako eraikin bat beharrezkoa dela. Gainera, eraikin hori orokorrean nolakoa izan behar duen ere definitu dugu”, adierazi dute Itziar Muñiz eta Jasone Sisniega talde eragileko kideek. Hortaz, lehenik eta behin “talde motorra abian jarri dugu batzarretan adostu duguna paperetik kalera lehenbailehen atera dadin”, gaineratu dute. Talde hori herritar eta udalaren arteko komunikazioaz arduratuko dela argitu dute.
Bigarren talde bat ere eratu dute “San Pedron ditugun azpiegituren erabileraz eta haien kudeaketaz hausnartuko du”. Eta azkenik, eraikinaren funtzionamendua eta ezaugarriak definitzeko beste lantalde bat eratu dutela adierazi dute. Ildo horretan, “autogestioan” oinarritutako eraikina izango dela aurreratu dute eragileek.
Udalaren konpromisoak
Prozesu honetan Pasaiako Udaleko Jose Luis Sanz alkateordeak hartutako konpromisoen berri eman du gaurko agerraldian. Hiru dira udal gobernuak bultzatuko dituen esparruak; hala nola: talde motorra martxan jartzeko laguntza ematea eta horren lana babestea; azpiegiturei etekin handiagoa ateratzeko asmoz udalak proposamen bat egitea; eta kultur beharrei erantzungo dien eraikina konpontzeko edota finantzatu eta ordenazioan sartzea.
