Reyes Carrere: "Kirola lehia baino askoz ere gehiago da"
Eskola Kirola programaren filosofiarekin bat egin du eskubaloi jokalari eta prestatzaile ohiak; tekniketatik eta taktiketatik harago, "kirol legez jokatzen" irakastea funtsezkoa dela iritzi dio kirolari errenteriarrak.
Gaur goizean egin ditu aipatu adierazpenak Reyes Carreresek, Albaolako Itsas Faktorian, Eskola Kirola programaren 2014-2015 ikasturteko datuak ezagutzera emateko antolatu duten prentsaurrekoan. Carrererekin batera bertan izan dira Oarsoaldeako lau kirol zinegotziak.
Pasaiako zinegotzi Miguel Mari Torreak esan duenez, Eskola Kirola jarraitzen du izaten eskola orduz kanpo aktibitate nagusia 8 eta 12 urte arteko ikasleen artean. Adin tarte horretan 2.457 ikasle daude eskolatuak Oarsoaldean, eta horietatik 1.480k egiten dute Eskola Kirola, hau da, erdiak baino gehiago (%54).
Aurtengo datuen berri Errenteriako kirol zinegotzi Unai Unsuainek eman ditu. Zehaztu duenez, aurten 137 talde osatu dituzte –iaz baino lau talde gehiago– eta horien prestaketan 83 entrenatzaile ari dira. Errenteria-Oreretan 77 talde daude; 24 Oiartzunen; 25 Pasaian eta 11 Lezon.
Nesken parte hartzea gora
Urtetik urtera, eta poliki bada ere, gora ari da Eskola Kirolean parte hartzen duten nesken kopurua. Parte-hartzaileen %40 dira neskak, eta %65 mutilak. Entrenatzen ere bada aldea; 65 mutil ari dira prestatzaile eta 18 neska. Erronka handiena, baina, kirolean trebatzen hasten diren neska horiek guztiak gerora kirola egiteari ez uztea da, hori baita gaur gaurkoz joera nagusia. Zentzu horretan Reyes Carreresek neska gazteei zuzendu zaie: “Segi kalera, jarraitu kirola egiten, eta aditzera eman zuen nortasuna, gogor”. Izan ere, Carreresentzat “kirola lehia eta osasuna baino zerbait gehiago da. Adierazpide bat, bakoitza zer den eta nolakoa den adierazteko modua”. Bide horretan aurrera egitera animatu ditu neskak.
Bide beretik, oso garrantzitsutzat jo du txikitan kirol asko probatzeko aukera sustatzeari, horrek gerora igartzen delakoan: “Goi mailara iristen diren kirolariak askoz hobeak dira baldin eta lehendik kirol jarduera asko praktikatu badituzte”.
