Protestei eutsiko dietela iragarri dute atez atekoaren kontrakoek
Asteazkenero egingo dituzte manifestazioak, 19:00etan, Gudarien Enparantzatik abiatuta. Udalari bere funtzioak betetzeari utzi izana leporatzen diote, "kalean protesta gisa utzitako zakar poltsa ez jasotzeagatik".
Hondakinak biltzeko sistema berria San Pedron eta Trintxerpen martxan jarri zenez geroztik, “zaborra hiru alditan baino ez dutela jaso” salatu dute atez atekoaren kontrakoek, eta jaso duten “hiru aldietatik bitan telebista kameren aurrean” egin dutela nabarmendu dute. “Utzikeria” egozten diote udalari, “beren funtzioak betetzeari utzi egin izana” eta horren ondorioz, “infekzio guneak” sortu eta arratoiak ugaltzen ari direla salatu dute.
Bide batez, Ulia etorbideko hainbat bizilaguni zakar poltsak lurrean uzteagatik isunak jarri dizkietela jakinarazi dute eta lehengo astean egin zuten asanbladan protestei eustea erabaki dutela iragarri dute. Asteazkenero egingo dituzte manifestazioa, 19:00etan, Gudarien Enparantzatik abiatuta.
