Antxotarrok Historia Mintegiak burdinbideen gaineko erakusketa antolatu du
Aurten 150 urte bete ditu Norteko Burdinbideak eta urteurrena aitzakia hartuta inguruko burdinbideei eskaini die aurtengo erakusketa Antxoko historia mintegiak.
Antxotarrok Historia Mintegiak inguruko burdinbideei eskaini die aurtengo erakusketa: topoa, portu barrukoa, Arditurrikoa, Nortekoa… Historia mintegiko kideek nabarmendu dutenez, “Antxoko barrutia oso ferrobiarioa izan da historikoki”, eta memoria hori berreskuratzeko egin duten lanaren bidez, “gizartearen aroak eta bereziki ekonomiaren gorabeherak ikasi ahal” izateko aukera izango dela iragarri dute.
Zehaztu dutenez, “informazio zehatzez eta argazki ezezagun ugariz” hornitu dute erakusketa, “historiaren alderdi interesgarri bat ezagutzeko aukera” eskainiz. Atzera ez ezik, aurrera begira ere jarri dira eta “etorkizuneko garraioei buruzko gogoetatxoa egiteko aitzakia ere” izango dela aipatu dute.
Erakusketa Antxoko kultur etxean izango da, ostiraletik hilaren 14ra bitartean.
