Errenteriako Udalaren webgunea .eus izango da aurrerantzean
Euskararen Nazioarteko Egunaren harira Puntueus fundazioak 1.192 domeinu izen berri aktibatu zituen eta tartean Errenteriako Udalarena dagoela jakinarazi dute. Horrenbestez, aurrerantzean udal webgunearen helbidea errenteria.eus izango da. Gauza bera gertatuko dela bere azpidomeinu diren webguneekin ere jakinarazi du udalak: “Errenteriako Udal komunikabidea den Herribizia.errenteria.eus, ADN Kraktiboaren adn.errenteria.eus, edo Errenteriako Film Laburren jaialdikoa, film.errenteria.eus”.
Helbide elektronikoak bigarren fase batean
Helbide elektronikoen domeinu aldaketa bigarren fase batean egingo dela eta momentuz orain arte bezala mantenduko dituztela jakinarazi du udalak, bestalde. Udalak dei egin die herritarrei, euren enpresa edo bestelako entitateak webgunea baldin badu, euskaraz jarri eta .eus domeinua eskuratzeko izena eman dezaten.
