Hirigune historikoa eraldatzeko, ekonomia eta enplegua suspertzeko laguntza plana prest dago
Hiru programako plana da, jarduera ekonomikoak aurrera eramateko lokalen alokairuak, egitasmo berritzaileak, eta enpresen sorrera diruz laguntzeko.
Errenteriako Udalak eta Oarsoaldea Garapen Agentziari esker, eta herriko hirigune historikoa eraldatzeko bidean, ekonomia eta enplegua sustatzeko diru laguntza prestatzen ari dira. Hiru ardatzetan banatuta egongo da plan hori, eta orotara, 265.000 euroko diru partida bideratuko dute horretarako. Julen Mendoza alkateak esan duenez, udal gobernu taldeak EAJrekin adostutako krisiaren aurkako planaren partidaren barrukoak dira bertan lor daitezkeen diru laguntzak. Fernando Nebreda Oarsoaldea Garapen Agentziaren kudeatzailearen laguntza izan du azalpenetan alkateak, herriko turismo bulego berrian egin duten agerraldian.
Honakoak dira diru laguntzen hiru ardatzak, Fernando Nebredak azaldu dituenak:
- Ekiteko programa: 36.000 euroko diru hornidurarekin, hirigune historikoan lokalak alokatzeko programa da, betiere lokal horietan jarduera ekonomikoa sustatzeko ekimenak egiten badira. 8 enpresa abian jartzea bultzatu nahi da.
- Ekitera programa: 90.000 euroko diru hornidurarekin, herrian enpresen sortzea sustatzeko diru laguntza lerroa da. 12 enpresa berriri lagundu nahi zaie honekin.
- Ekitera Plus programa: 90.000 euroko hornidurarekin, herrian egitasmo berritzaileak sustatu eta garatzeko programa da. Sei egitasmo sortu nahi dituzte laguntza hauekin.
