Larunbatean aterako dute ikatza Arditurriko txondorretik

Festa giroan, eta Olentzeroren Lagunak taldearekin, osatuko dute ekitaldia. Bi tona egur ikatz aterako dituzte.

2014/12/16

20 egunez piztuta ondoren, larunbatean itzaliko dute Arditurriko txondorra, hau da, bertatik egur ikatza aterako dute. Festa giroko eguna izango da gainera, askotariko jarduerak antolatu dituztelako. Joxe Billaluze, Joxe Manuel Etxarte, Josetxo Arbelaitz eta Joxe Ramon Agirre ikazkinek Olentzeroren Lagunen laguntza izango dute txondorra itzaltzen. Honakoa da egitaraua:

17:00etan, Irrien Lagunen eskutik, kalejira egingo dute dultzaineroekin Arditurriko aparkalekutik abiatuta.
17:30-18:30, Olentzerori gutunak idazteko aukera izango dute hala nahi dutenek Abaraxkako kideen laguntzarekin. Haurtzaro ikastolako kideek gaztainak, sagardoa, eta txondorraren ikatzarekin erretako txistorra pintxoak banatuko dituzte.
18:30ean, Olentzeroren Laguntzaileek ikatza aterako dute.
Arratsalde osoan, Tren Berda martxan egongo da Olatxeko zubitik Arditurrira.

Behin ikatza aterata, Olentzeroren Laguntzaileek hilaren 24an Oiartzungo plazara eramango dute. Txondorra 9.000 kilo egurrekin kargatu zuten, eta hortik bi tona ikatz aterako dute gutxi gorabehera. Aurten, orotara, 3.500 lagun inguruk bisitatu dute Arditurriko txondorra. Bisita gidatuak oraindik ere egin daitezke, eta bideo saioak nahiz argazki erakusketak ere abian daude.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.