EAJ Kaiko Herrera erostearen alde agertu da
"Proposamenak azterketa sakonagoa behar duela" nabarmendu dute jeltzaleek, eta aldundiaren asmoa begi onez ikusi dute arren, "erabakia berandu eta hauteskundeen atarian datorrelako" kritiko mintzatu dira.
EH bilduk gai honetan “behingoz jarrera pragmatikoa” erakutsi izana txalotu du EAJk eta Kaiko Herrera erostearen alde agertu da, horrek biziberritzerako pausuak ematea ahalbidetuko duelakoan. Edonola ere, gogor gaitzetsi dute proposamena orain egin izana, “legealdi osoan, ez udalean ez aldundian EH Bilduk ezer egin ez” duelakoan. Denbora alperrik galtzea leporatu diote koalizio abertzaleari eta etengabeko konfrontazioan aritu izana. “Galdutako urteak berreskuratu behar ditugu, elkarlanean aritzeko garaia da, guztion artean herritarren eta Pasaiaren interesak defendatu behar ditugu” adierazi du jeltzaleen bozeramaile Nahikari Oterminek. Pasaiak bizi duen egoera hobetzeko gakoa elkarlana dela iritzi diote jeltzaleek.
