Egutegi "berezia" salgai jarriko du bihar Ihote taldeak
Intxixu eta Sorginei egindako argazkiekin osatu dute egutegia; lehen aldiz jarriko du taldeak postua Txerri Egunean.
Txerri Eguna ospatuko dute bihar Oiartzunen eta lehenbiziko aldiz postua jarriko du Ihote taldeak. Azaldutakoaren arabera, “aurten 25 urte betetzen dira Ihoteak berreskuratzen hasi zirenetik”. Hori dela eta, “Intxixu eta Sorginen laguntzaileak, Ihote taldeko kideak, mendira igo dira eta gure inauterietako protagonistei argazkiak ateratzen ibili dira”. Hala, egutegi “berezi” bat sortu du taldeak Intxixu eta Sorginen irudiekin, euren eguneroko lanak egiten.
Egutegiak 5 euroan salgai jarriko ditu taldeak eta eguna bukatu ahala, herriko hainbat gunetan zehar ere salgai jarriko dituzte. “Irabazitako dirua Intxixu eta Sorginak menditik jaitsi eta plaza hartzeko beharrezkoa duten guztia lortzeko erabiliko da”, bukatu dute taldekideek.
Informazio gehiagorako bertan sar daitezke interesatuak.
