Alokabideren 'Zabaldu ezazu zure etxea' kanpainak bere egongela jarri du Herriko Plazan
Etxe hutsak alokairura bideratzeko kanpaina martxan dauka Alokabidek. Batez ere, etxebizitza hutsen jabeei bideratuta dago, alokairura bidera dezaten. Eusko Jaurlaritzak, Alokabideren bitartez, jabeek dirua kobratzeko eta etxearen osotasuna mantentzeko bermeak eman nahi dituzte.
Etxe hutsak alokairura bideratzeko kanpaina martxan dauka Alokabidek. Kanpainaren bigarren fasea —Zabaldu zure ateak, irabazi segurua lelopean— gaur hasi du, eta Errenteria-Oreretan izan dira. Egongela modukoa ezarri dute Herriko Plazan, informazioa banatzeko asmoz.18:00ak arte izango dira bertan.
Irune Berasaluze Alokabideko zuzendari nagusiak adierazi duenez, 80.000 etxebizitza huts daude Euskal Autonomia Erkidegoan, eta horietatik alokatzeko moduan daudenak 45.000 direla argitu du. Guztira, hiru herrialdeetan, 46.000 dira Alokabiden izena eman dutenak. “Etxe hutsik duen jabe batek errenta ez kobratzearen edo etxean txikizioak egitearen beldurra izan dezake”, gaineratu du Berasaluzek.
Kanpaina horren bitartez jakinarazi nahi dute Eusko Jaurlaritzak, Alokabideren bitartez, “segurtasuna” eman nahi diela etxe horien jabeei. Hori ASAP (Alokairu Segurua Arrazoizko Prezioan) programaren bitartez egiten dute. Bestalde, Bizigune programarekin, etxebizitza hutsa Alokabideren eskuetan utzi eta haiek arduratuko dira kudeaketaz. Jabeak dirua hilean garaiz jasoko du.
Bilatzaileentzako ere
Alokabideren webgunean etxea bilatzen dutenek ere badute beren txokoa. Zein etxe dauden ikus dezakete, eta erreserba egin ere. Berasaluzek gogorarazi duenez, diru sarreren %30 baino gehiago ez da alokairuan ordainduko.
Gaur egun 11.000 etxebizitza kudeatzen ditu Alokabidek, eta horietatik erdia dira pribatuak.
Alokabideren egongela, informazioa banatzeko
