Presoei zigorra "bidegabeki" luzatzeko erabakia salatu du Sortuk
Elkarretaratzeak egin zituzten atzo Oarso Bidasoko herrietan (irudian Antxokoa), espetxe politika eta errepresioa salatzeko; larunbateko manifestaziora biltzeko deia egin dute.
Auzitegi Gorenak hartutako erabakia salatzeko elkarretaratu ziren hamarnaka herritar Antxon atzo arratsean Sortuk deituta. Aski da! errepresiorik ez lelopean, eta Alde hemendik! aldarriak eskuan, euskal preso politikoei zigorrak “bidegabeki” luzatzeko hartutako erabakia salatu zuten. Alderdi popularra jo zuten erabakiaren arduradun, eta salbuespenezko neurrietan oinarritzen den espetxe politika bultzatzen dutela salatu.
Horrez gain, asteleheneko 16 atxiloketak salatu eta larunbaterako Donostian deitu duten manifestazioan parte hartzeko deia zabaldu zuten. 17:00etan abiatuko da manifestazioa larunbatean, Antiguako tuneletik.
