Pasaiako EH Bilduk begi onez ikusten du aldundiak Kaiko Herrera erosteko egin duen proposamena
Koalizioak gogor gaitzetsi du EAJk eta PSE-EEk herriko biziberritzean jokatuko duten papera.
Gipuzkoako Foru Aldundiak luzatutako proposamena Pasaiako biziberritzerako “inflexio puntua” izan daitekeela iritzi dio Pasaiako EH Bilduk, kaiko Herrera erosteko egin duen proposamena “portuak hamarkadatan abandonatuta eduki duen lur publikoa herrira bueltatzeko proposamen formala eta erreala” dela iruditzen baitzaio. “Proposamena oso begi onez ikusten dugu eta hamaika ikusitakoak bagara ere, zaila egiten zaigu norbaitek honi ezetz esan diezaiokeela imajinatzea” esan dute.
Horregatik, Eusko Jaurlaritzari deia luzatu diote, Gipuzkoako Foru Aldundiarekin bat egin dezan eta “Pasaiari lur horiek itzultzeko pausuak lehenbailehen eman ditzan”. Zentzu berean, Portuko ordezkariei bide beretik jarraitzeko deia egin diete. “Borondate politikoa da behar den bakarra, hainbeste urte eta gero Pasaiako biziberritzean aurrerapauso errealak ematen has gaitezen”, gaineratu dute.
Luzuriaga, eperik gabe
Askoz kritikoagoa izan da EH Bildu EAJ eta PSE-EErekin. Jeltzaleak biziberritzea bultzatu ordez “oztopo” izan direla defendatu dute, eta besteren artean, gogor kritikatu dute aurtengo AESak bermatzeko nahiko dirua bideratu ez izana, edota Luzuriagaren urbanizaziorekin aurrera egin ahal izateko diru partidarik aurreikusi ez izana. “2015eko aurrekontuetan 100.000 euro ziztrin soilik bideratuko ditu Pasaiako biziberritzera”, deitoratu dute, eta PSE-EEri Jaurlaritzako aurrekontua babestu izana leporatu diote.
