Kirola, alde guztietatik begiratua, Oiartzungo Kirol Astean
Hilaren 26tik 31ra futbolaz, mendi lasterketez, txirrindularitzaz, pilotaz, kirol elikaduraz, emakumea eta kirolaz, nahiz euskal kirolez hitz egingo dute herrian.
Kirola zertarako galderari erantzuteko asmoz, Kirol Astea egingo dute Oiartzunen hilaren 26tik 31ra. Oiartzungo Udaleko Kirol Sailak antolatu ditu jardunaldiak, eta kirolaren alde guztiak ukituko dituzte hitzaldi eta erakustaldi bidez. Horretarako kirolaren hainbat arlotako kideak izango dira herrian, baita herriko kirol elkarteetako ordezkariak ere.
Kirolaren onura fisikoak dudaezinak diren heinean, jardunaldien bitartez goi mailako kirolariek nahiz herri mailakoek euren esperientzien berri emango dute, eta esperientzia horiek kontatzerako orduan egiten den kirolaren ezaugarriak, nahiz generoa, landuko dituzte. Honakoa da jardunaldien egitaraua:
- Hilak 26, astelehena. Gaia: futbola. 19:00etan, udaletxeko areto nagusian, Nerea Abancensek, Jon Ansotegik, Eñaut Fernandezek eta Maitane Toledok solasaldia egingo dute, moderatzaile Joxe Migel Lopez dela.
- Hilak 27, asteartea. Gaia: mendiko lasterketak. Leire Agirrezabalak, Uxue Frailek, Iker Karrerak eta Jokin Lizeagak hitz egingo dute, Gorka Herce moderatzaile izango dutela, 19:00etan, Elorsoro kiroldegiko bilera gelan.
- Hilak 28, asteazkena. Gaia: txirrindularitza. Elorsoro kiroldegiko bilera gelan, 19:00etan, Dorleta Eskamendik, Migel Mari Lasak, Lierni Lekuonak eta Patxi Vilak hitz egingo dute. Moderatzailea Mikel Astarloza izango da.
- Hilak 28, asteazkena. Gaia: elikadura eta kirola. Txirrindularitzako hizketaldiaren ondotik, 20:00etan, Anna Saulo eta Aritz Urdanpilletak euren bizipenen berri emango dute, Elorsoroko bilera gelan ere.
- Hilak 29, osteguna. Gaia: pilota. Elorsoro kiroldegiko bilera gelan, 19:00etan, Abel Barriolak, Patri Espinarrek, Ander Imazek eta Maider Mendizabalek euren iritzia emango dute. Joxe Migel Lopezek gidatuko du hizketaldia.
- Hilak 30, ostirala. Gaia: emakumea eta kirola. Maite Maiorak, Ainhoa Tolosak eta Matxalen Ziarsolok emakume eta kirolari izateak dituen xehetasunak aztertuko dituzte, Ainhoa Azurmendik moderatuta, 19:00etan, Elorsoroko bilera gelan.
- Hilak 31, larunbata. Gaia: euskal kirolak. 17:30ean, udaletxeko areto nagusian, makil borrokaz, erraketistetaz, eta pasaka jokoaz ariko dira Iñaki Ganboa, Gloria Agirre, Jon Juanes, Ainhoa Palomo, Anton Mendizabal eta Joxe Mari Mitxelena.
