Lau berritasun nagusi ekarriko dituzte aurtengo inauteriek
Azeri Dantzarekin batera, ekitaldia egingo dute Herriko Plazan. Gainera, herri bazkaria eta kuadrillen jaitsiera egingo dituzte otsailaren 14an. Tabernen mozorro lehiaketa ere abian jarriko dute.
Errenteria-Oreretako Inauteri Batzordea jai horietako egitaraua doitzen ari da, hiru asteren faltan. Inauterietan lau berritasun izango direla jakinarazi dute. Horrela, lehenik eta behin, jaien hasiera izango da (otsailaren 12an). Azeri Dantza egiten dutenak —aurten herritarrei zabaldu zaie parte hartzeko aukera— udaletxeko balkoira irtengo dira, eta ekitaldi berezia egingo dute jaiei hasiera emateko. Herritarrak Herriko Plazara agertzera gonbidatu dituzte.
Otsailaren 14an izango dira beste bi berritasunak. 14:00etatik aurrera herri bazkaria egingo dute, Merkatuzarren. Txartelak honako toki hauetan eros daitezke: Reyna taberna, Xera gastroteka, Aralar taberna eta Xenpelar kulturdendan. Helduentzako txartelak hamabost euro balioko du, eta haurrentzako, berriz, hamar. Otsailaren 6an izango da txartelak eskuratzeko azkeneko eguna.
Arratsalde horretan, konpartsak irtengo dira 18:30ean. Lehenago, baina, kuadrillen jaitsiera egingo dute, Xanti eta Maialenen konpartsak lagunduta. Irteera 18:00etan izango da, eta ordubete lehenago izena eman behar da Tulle kalean (Zuzen tabernaren parean).
Azkenik, tabernen mozorroen lehiaketa izango da beste berritasunetako bat. Egitarau osoa astelehenean argitaratuko dute, Herri Bizia webgunean.
Inauterien Batzordea, jaien kartelarekin
