Lan hitzarmenaren defentsan greba egin dute gaur izotz fabrikako langileek
Etzirako beste greba deialdi bat egin dute, eta aste honetan zuzendaritzaren aldetik erantzuna ez lortzekotan astelehenetik aurrera greba mugagabea egin asmo dutela iragarri dute.
Pasaiako arrandegian gaur ez da izotz ekoizpenik egon. Izotz fabrikako langileek greba egin dute “lan hitzarmen duin baten defentsan”. 2012az geroztik ez dute hitzarmena berritu, eta zuzendaritza negoziatzera eser dadin behartu nahi dute, orain arteko elkarrizketa saiakera guztietan porrot egin dutelako.
Elkarretaratzea egin dute gaur goizean San Pedron, eta etzi ere greba egingo dutela ohartarazi, Pedro Deun kofradiaren aurrean, 10:00etatik aurrera elkarretaratzea deituta. “Zoritxarrez ez dugu erantzunik jaso, baina espero dugu lehenbailehen jasotzea, azkenean langileek greba egiteak kristoren kaltea egiten dielako beste sektore batzuetako langileei, bai arrantzaleei, baita arraina salmentan aritzen direnei” ohartarazi du LAB sindikatuko Iker Calladok.
Gaur lehen greba eguna izanik, arrandegian ez dute eragina gehiegi sumatu, baina negoziazioa lortuko ez balute, langileek datorren astetik aurrera greba mugagabea egingo dutela iragarri dute, eta orduan bai, ondorioak larriagoak izan daitezke. “Espero dugu zuzendaritza lehenbailehen deitzea eta mahai batean esertzea negoziatzen hasteko”.
Urteko soldata igoera eskatzen dute langileek, eta lortuko den hitzarmena etorkizun batean ere aplikatuko dela bermatzea. Horiexek dira langileen aldarrikapenak.
