Martxoaren 21eko eguerdian iritsiko da Korrika Oiartzunera
Bigarren Korrika batzordea ostiralean egingo dute, 17:30ean, Fermiñenen. Kilometroak erosteko aukera zabalik dago.
Bi hilabete baino gutxiago falta dira Korrika Oiartzunera iristeko. Martxoaren 19an hasiko da Urepelen AEKren aldeko festa ibiltaria, eta 21ean iritsiko da Oiartzunera, 12:23ak inguruan (antolatzaileek eman duten ordua da hau, Korrikaren martxaren arabera alda daitekeena). Oiartzundik zehar 48 bat minutu egin ondoren, 13:11an lekukoa irundarrei emango diete.
Oiartzunera iritsi aurretik, Astigarragatik Perurenara iritsiko da Korrika (11:37an Perurenan). Handik Errenteria-Oreretara joan, eta oiartzuarrek, esan bezala, martxoaren 21eko 12:23 inguruan hasiko dira herritarrak lekukoa elkarri ematen, eskuz esku.
Hilaren 22an ere Oarso Bidasoan izango da Korrika. Hendaiatik Hondarribia goizaldean iritsiko da (06:10 inguruan), handik Lezora (07:13) joateko. Lezoarrek sanjuandarrei emango diete lekukoa (07:48erako dago egina aurreikuspena), eta San Pedro-Trintxerpe-Kontadores-Herrera-Buenavista bidea egin ondoren, Antxora iritsiko da. 08:53 inguruan Altzarako bidea hartuko du Korrikak.
Hurrengo batzordea
Oiartzungo hurrengo Korrika batzordea hilaren 30ean (ostirala) egingo dute, 17:30ean, Fermiñenen. Bertan Korrika iritsi aurretik eta bitartean egin daitezkeenak aztertuko dituzte. Herritar orori, eragile nahiz norbanako, dago zabalik batzordea. Kilometroak ere eros daitezkeela esan dute AEK-ko kideek.
