Kontxa Murgia oroituko dute berriz ere Oiartzunen

Juanba Berasategiren dokumental bat eta Kepa Junkeraren kontzertua egingo dituzte herrian, ohiko omenaldi ekitaldiarekin batera.

Urko Etxebeste Petrirena

Oarsoaldea

2015/01/27

Manuel Lekuona Biblioteka denean jaio zen Murgia. Bertan plaka hau jarrita dago.

Kontxa Murgia Egaña oiartzuarra Manuel Martinezen ama izan zen: Galiziako abertzaletasunaren aitzindaria izan zen Martinez, eta gainera, Rosalia de Castrorekin ezkonduta egon zen. Hori guztia urtero-urtero oroitzen dute Oiartzunen, eta aurten, hilaren 29tik 31ra izango dira Kontxa Murgiaren aldeko ekitaldiak. Oiartzungo Udalak eta Pasaiako Fato Cultural Galekok antolatu dituzte jarduerak. Jarduera horiek aurten euskal kulturaren izen handiak ekarriko dituzte Oiartzunera. Hala, Juanba Berasategi sanjuandarraren Galiziarrak Euskal Herrian dokumentala ikusteko aukera egongo da, eta Kepa Junkerak kontzertua emango du, Galiza diskoan oinarritutakoa. Honakoa da egitarau zehatza:

Hilak 29 (osteguna): 19:00etan, udaletxeko areto nagusian, Juanba Berasategiren Galiziarrak Euskal Herrian dokumentalaren proiekzioa, eta ondoren, mahai-ingurua Xose Estevez historialariarekin.
Hilak 30 (ostirala): 20:30ean, udaletxeko areto nagusian, Kepa Junkeraren kontzertua, doan. Galiza diskoa aurkeztuko du bizkaitarrak, eta Manu Gomez eta Dani Lumbreras gaita jotzaileen laguntza izango du.
Hilak 31 (larunbata): lore eskaintza egingo diote Kontxa Murgiari bera jaio zen etxean, Manuel Lekuona Bibliotekan, 12:00etan hasita. Desfilea egingo dute udaletxetik bertara, txistulari eta gaitza jotzaileekin.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.