Bizikleten erregistroa martxan da Pasaian
Egitasmoa aurkeztu du udalak, bultzatzaile eta laguntzaile izan dituztenekin
Udal gutxik dute Gipuzkoan bizikleten erregistroa, baina herriak oinezkoentzako irabazi nahian ari direnek, gutxika ari dira batzen egitasmora, eta Pasaia aitzindarien artean kokatu nahi izan du. Honenbestez martxan da Pasaian bizikleten erregistroa. Atzo aurkeztu zuten, Trintxerpeko alkateordetzan, udaltzainen egoitza nagusian. Izan ere, herritarrek hara jo beharko dute bizikletak erregistratzera.
Amaia Agirregabiria alkatea izan zen aurkezpenean, mugikortasun zinegotzi Haritz Lopezek lagunduta. Udaltzainen buru Iñaki Portugal ere han izan zen, eta ondoan izan zituzten KATeko Josetxo Maneiro eta Kaiet Lopez de Etxezarreta, eta Itsaszerbi enpresako Iñigo Alzua.
Lapurreten kasuan bizikleta errazago berreskuratu ahal izatea da erregistroaren helburuetako bat. Izan ere, hala gertatzen den kasuetan, erabiltzaileak bizikleta berea dela frogatzeko modua izango baitu. Interesatuek udaltzainengana jo behar dute bizikletak erregistratzeko, Trintxerpeko alkateordetzara. Han bizikletaren argazkia atera eta bastidore zenbakia jasoko dute. Ondoren bizikleta erregistratua dagoela egiaztatzen duen pegatina jarriko diote interesatuari, eta erabiltzaileak hala nahi izatekotan zenbakia trokelatu egingo diote bizikletari.
Bizikleta erregistratzen duten pasaitarrek, trukean, doan pasa ahalko dute bizikleta motoran.
Datozen lau hilabetetan fakturarik gabe erregistratuko dituzte bizikletak, baina hortik aurrera bizikleta norberarena dela frogatzeko dokumentazioa eskatuko dute bizikletak erregistratu ahal izateko.
