Enplegu plan berria martxan jarri du Errenteriako Udalak
Sei lanpostu berri sortuko dituzte. Udalerriko langabetuak kontratatzeko asmoa dute, baita lizentziatu berri direnak ere.
Errenteriako Udalak, Oarsoaldea garapen agentziarekin batera, enplegu plan berria abiatu du. Horrela, sei lanpostu berri sortuko dituzte. Udalerriko langabetuak kontratatzeko asmoa dute, “batez ere kualifikazio baxua dutenak eta lan merkaturako adin tarte zaila duten pertsonak”. Horiez gain, lizentziatu berri diren gazteei dago zuzenduta plana.
Iraupen mugatuko sei lanpostu horiek honakoak dira: arotz bat, lorezain bat, hiru peoi balioanitz eta komunikazio teknikari bat. Hainbat baldintza bete beharko dituzte: langabezian egon behar dute, Lanbiden alta emanda edukita eta Errenteria-Oreretan erroldatuta. Horrez gain, lanpostuarekin bat datorren formazioa izatea da beste eskakizunetako bat.
Lan eskaintzen xehetasunak www.oarsoaldea.net helbidean daude, eta argitaratu eta zazpi egunekoa izango da izena emateko epea. Oarsoaldeak Olibet auzoan duen bulegora joan daitezke interesa dutenek informazio eske.
Errenteriako Udalak gogorarazi duenez, 600.000 euro bideratuko dituzte aurten antzeko enplegu planak sustatzeko.
