Udala eta aldundia ari dira omenaldia prestatzen, Untzi Museoaren bitartez.
Pasaiako portuko azken bakailao-ontziak.
Bakailaoaren arrantzaren inguruan lan egin duten edo lanean diharduten gizon eta emakumeei omenaldia antolatzen ari dira Gipuzkoako Foru Aldundia eta Pasaiako Udala, Untzi Museoaren laguntzaz. Omenaldia, martxoaren 19an izango da, Trintxerpeko Ziriza Etxean.
Donostiako Untzi Museoan ikusgai dagoen
Bakailaoaren arrantza, ur handiak erakusketaren testuinguruan kokatu behar da omenaldia. Antolatzaileek esan dutenez, “jarduera hau posible egin zuten emakume eta gizonei omenaldi bat egitea da” asmoa eta, bide batez, “Pasaiako bakailaoaren arrantzaren historia hobeto ezagutzea ahalbidetuko duen informazioaren eta material grafikoaren bilketa egitea”.
Parte hartzeko deialdia
Omenaldian ahalik eta pertsona gehien bildu nahiko lituzkete antolatzaileek eta horregatik, parte hartu nahi duten guztiei bere datuak emateko eskatu diete. Bihar hasiko dira omendutakoen datuak biltzen eta datorren asteko asteartera arte egongo da izena emateko aukera, egunero, 11:00etatik 13:00etara eta 16:00etatik 18:00etara.
Interesdunek ondoren zehatzen diren tokietara jo behar dute izena ematera: Azti eraikinera (Herrera kaia),
Mater itsasontzira (Pasai San Pedro) edota Pasai Donibaneko turismo bulegora.
Halaber, material grafikoa edota jardueraren inguruko datuak biltzen ondoko toki hauetan ari direla jakinarazi dute: Trintxerpeko Jubilatuen Elkartean (Javier Anatol),
Mater itsasontzian (Pasai San Pedro), Trintxerpeko Erdibana tabernan eta Untzi Museoan.