Biek, proba irabazteaz gain, su ebakiaren igoeran denborarik onena egin zuten. HITZAk helmugako argazkiak jaso ditu.
Irabazleak, Maddi Fernandez, eta Markel Merinoren senide eta lagunak, atzo, sarien banaketan
Iker Oliveri hondarribiarra eta Maite Maiora mendaroarra izan ziren atzo garaile Lezo-Jaizkibel mendi lasterketaren bigarren ekitaldian. Garaipen bikoitza izan zen haiena, gainera: 14 kilometroko proba irabazteaz gain, su ebakiaren igoeraren sari berezia ere irabazi zuten biek. Sari bikoitza eraman zuten etxera, beraz. Iker Oliverik bitik bi ditu Lezo-Jaizkibelen, bi edizioak irabazi dituelako. Maiorak parte hartzen zuen lehenean eraman du txapela etxera. Probaren argazkiak ikusteko aukera, Hitza-ren webgunearen
Irudiak atalean.
Lezotarrak Lasterkari Taldeak antolatutako proba ikusgarria izan zen, alde askotatik begiratuta. Batetik, parte hartzaileen kategoriari dagokionez, bestetik zirkuituaren —berritasun eta guzti, herrigunean batez ere— egoera bereziagatik (azken egunetako euriteek lokatzez bete dute bidea), antolatzaileen lan bikainak ere ikusgarritasunaren ardatz izan zen, eta nola ez, Lezok nola erantzun zuen ere nabarmentzekoa izan zen. Festa izan zen atzo Lezo, Gurutze Santuaren plaza batez ere.
Eta probak, Markelen Irria egitasmoari esker, kolore berezia izan du aurten, larunbatetik igandera Markel Merinoren alde egin zen 100 kilometroko probari esker.
Sarien banaketan, Maddi Fernandez bodyboard kirolari lezoarrari ohore egin zioten antolatzaileek, kirol horretan daraman bideagatik: iaz, 16 urterekin, Gazte Mailako Espainiako txapeldun izan zen, eta Europako bigarren.
Lurdes Oiartzabal, bigarren
Lurdes Oiartzabal bigarren izan zen emakumeen kategorian —Lezoko lehen emakumearen saria ere jaso zuen—. Maiora handiaren atzetik proba bukatzea ez zen nolanahikoa izan, are gehiago jakinda larunbatean Ermuako duatloia irabazi zuela. Hirugarren Uxune Tena andoaindarra izan zen.
Gizonetan, Oliveri hondarribiarraren atzetik, Imanol Larrañaga azkoitiarra eta Mikel Beunza ultzamarra (Nafarroa) sailkatu ziren. Ondokoak dira sailkapen zehatzak:
Sailkapenak
Gizonak
- Iker Oliveri 1:06:39
- Imanol Larrañaga 1:07:39
- Mikel Beunza 1:08:48
Emakumeak
- Maite Maiora 1:17:33
- Lurdes Oiartzabal 1:23:57
- Uxune Tena 1:24:02
Su ebakian azkarrenak
- Iker Oliveri
- Maite Maiora
Lezoar onenak
- Lurdes Oiartzabal
- Raul Artola
Sailkapena Kirolprobak-en
