Markelek irribarre egiteko arrazoiak baditu [bideoa]

Markel Merinoren aldeko 100 kilometroko balentriaren ondoren, larunbatean, haurraren aldeko jaia egingo dute

Urko Etxebeste Petrirena

Lezo

2015/02/23

Kalu Erice, Josu Andueza eta Iban Angulo, larunbatean, Markelekin

Markel Merinoren alde herri bat elkartu da. Batu da. Halakoa izan da asteburua Lezon, Markelena. Bost urteko hau lezoarra gaixo dago, garun paralisia dauka, eta haren bizitza kalitatea hobetzeko tratamendu egokiena garestia da, oso. Horregatik ari dira Markelen Irria iniziatibako kideak haren alde lanean, tratamendua finantzatzeko laguntza bila. Horren adibiderik indartsuena asteburuan bizi izan da Lezon, Arkaitz Kalu Ericek, Josu Anduezak, eta Iban Angulok 100 kilometroko balentria egin dutelako Oarsoaldea eta Bidasoa osotik, hainbat lagunen laguntzarekin. 19:00etan irten ziren korrikalariak Lezoko Gurutze Santuaren plazatik larunbatean. Aurretik, Sutargi Abesbatzak eta Lezoko Dantzazaleek emanaldia egin zuten, korrikalariak, Markel eta haren familia bertan zirela. Abiatu aurretik, “100 kilometroko erokeria” zergatik egin duten azaldu zuen Ericek, “Markelen alde, noski, eta jendartea harekin, eta gaixo dauden haur guztiekin sentsibiliza dadin”. Esan eta egin. Elkartasun uholdea jaso du Markel Merinok asteburuan, eta horrela jarraitu behar du. Asteburuko izerdia eta gehiago behar ditu haur lezoarrak. 100 kilometroko bidea neketsua, gogorra izan zen. Leher eginda iritsi ziren atzoko 09:30ean Lezoko plazara korrikalariak. Nekea, zain zuten jendetzaren txalo eta oihuek ez zieten kendu korrikalariei, baina bai arindu. Hunkigarria izan zen oso iritsiera, izan ere, lezoar askok nahiz Lezo-Jaizkibel mendi lasterketako partaideek egin zieten harrera elkartasuna eta kirola uztartu zituen erronkaren egileei. Bizitza osorako borroka du Markel Marinok bere gaixotasunarekin. Bidean laguntza baduela badaki, hark, eta haren hurbilekoek. Larunbatean, jaia Larunbatean, 16:30etik aurrera, haurraren aldeko jaia egingo dute Bekoerrota kiroldegian. Sarrerak ia agortuta daude. Magoak, pailazoak, tailerrak, musika, dantza eta bestelakoak izango dira, pintxo potea barne. Asteburu honetakoa biribiltzeko aukera aparta da.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.