Udalak Proisa eraitsi eta eremua ordenazioan sartzeko agindua eman du
Pitzadura gehiago azaldu dira eraikinean eta ingurua hesitu du udalak, segurtasunarengatik; alderdiei "zentzuz eta arduraz" jokatzeko eskatu diete Proisaren aldeko mugimenduko kideek.
Proisa eraistea erabaki du udalak. Pitzadura berriak azaldu dira pilotalekuaren frontisa aldera ematen duen paretan, eta udal arkitektoak eraikina bota behar dela ebatsi du. Teknikoek emandako irizpideei jarraiki, ingurua hesitzea erabaki du udalak “inor zauritua gerta ez dadin”, eta eraikina ahalik eta azkarren eraitsi ahal izateko tramitazioari ekin dio.
Udaleko arduradunak atzo bildu ziren Proisaren aldeko plataformako kideekin, azken erabakien berri helarazteko. Eraispenaren berria emateaz gain, parte hartze prozesuan adostutako guztietan berresten direla adierazi die udalak eta, ondorioz, Proisaren eremua ordenazioan txertatzeko agindua eman dutela jakinarazi diete.
Otsaileko plenoan aho batez onartu zuen plenoak Proisa ordenazioan txertatzeko eskaera, babesa eskainiz kultur plataformako kideek defendatutako mozioari. Mozio berean, arau subsidiarioak aldatzeko beharko den dirua aurrez kontuan hartzeko eskatu zuten Proisaren aldekoek.
Arduraz eta zentzuz jokatzeko deia
Proisaren aldeko plataforman bildu diren herritarrak alderdi politiko guztiekin ari dira harremanetan, eta egoera berri honen aurrean “zentzuz eta arduraz” jokatzeko eskatu diete guztiei. Izan ere, Proisarentzako egoitza berria eraikitzeko bidean oso garrantzitsuak izan daitezkeen bi diru partida daude jokoan. Batetik, iaz aldundiak Oarsoaldean burutu zuen parte hartze prozesuaren barrukoa –74.200 eurokoa- eta bestetik udalak eta aldundiak udalerriaren biziberritzerako sinatzeko duten hurrengo hitzarmenak jasoko lukeena –1.340.000 eurokoa–.
Lehen partida eraikinaren erabileraren inguruko parte hartze prozesua aurrera eramateko eta ondoren aurreproiektua egiteko litzateke, eta bigarrena, berriz, aurrez definitutako eraikina altxatzeko.
Lehen partidaren ingurukoak, hil honen bukaeran erabaki daitezke. Oposizioak atzera bota zuen foru gobernuak Oarsoaldeko parte hartze prozesuan herritarrekin adostutako 500.000 euroko partida, baina hauteskundeen aurretik egingo duten azkeneko plenora, EAJk eta PSE-EEk partidari eusteko proposamenak eramango dituzte, plataformako kideek aurreratu dutenez.
Honen aurrean, Proisaren aldeko plataformako kideek “herri iniziatibak errespetatzeko” eskatu diete alderdiei, “bere arteko gatazka politikoak alde batera utzi eta herri borondatea errespetatu dezatela”.
Bien bitartean, San Pedron, Proisak ez dio utziko kultura eta sormena sustatzeari, are gehiago, beren dinamika handitu nahiko lukete “mugimendua hil ez dadin”, eta hurrengo deialdia, larunbaterako egin dute, barrutiko beste hainbat eragilerekin batera. 11:00etan, frontoiko plazan, Korrikarentzako dirua bildu asmoz izango den artisau azokan parte hartzera deitu dute denek.
Proisaren aldeko plataformako kideak, mozioren defentsan
