1.350 familiek jaso dute kubo marroia lehen lau egunetan
Astelehenean hasi zuen Errenteriako Udalak materia organikoa jasotzeko edukiontzi marroiak jartzen eta kuboak banatzen. Kanpaina martxoaren 30ean bukatuko da, eta bitartean izena eman daiteke, udaletxean dagoen bulegoan edo auzoetan ibiliko den bulego ibiltarian. Lehenengo lau egunetako balantzea “ezin hobea” izan dela adierazi du udalak. 1.350 familiek eman dute izena, populazioaren %8. Horrek arreta zerbitzua indartzera behartu die.
Gogorarazi dutenez, datorren astean Olibet-Ugarritze, Iztieta, Alaberga eta Galtzarabordan egongo da bulego ibiltaria. Adierazi dutenez, hondakinak bereizteko gidaliburua zabalduko dute udalerri osoan.
Edukiontzi marroiak etxebizitza batean jasotzen den hondakinen %40 jasotzeko prestatuta dago, eta horrek birziklapen tasa “nabarmen” handituko duela jakinarazi dute. Birziklapen boluntarioan parte hartuko duten familien ingurumen sentsibilitatea eta jarrera eskertu du udalak.
Azkenik, gogorarazi dute edukiontzi marroia irekitzeko txartelak edozein auzotan balio duela, eta edozein ordutan ireki daitekeela, behar adina alditan. Poltsa konpostagarriak —kuboarekin banatu dituztenak— bakarrik erabil daitezke, eta itxita bota behar dira.
Ezker Anitzak herritarrak animatu ditu
Ezker Anitza pozik dago bosgarren edukiontzia jarri delako, eta gogorarazi du datorren urtean bilduko diren hondakinen %60 jaso behar dela. “Inork ezin du zifra hori ahaztu, eta horrek zehaztu behar ditu gaur egungo zein etorkizuneko hondakin politikak”, esan du ezkerreko koalizioak.
Errenteriarrei jarrera “ekoaktiboa” izateko deia luzatu diete, eta materia organikoa jasotzeko banaketan izena emateko animatu diete. “Hondakinen gaia gatazkarako erabiltzen dutenei muzin egin behar diete”, esan dute. Gaineratu dutenez, Udal Gobernu Taldeak emandako urratsak hondakinen gaia “politiko izatetik herritar izatera pasatu da”.
Errausketa gaitzetsi dute, eta birziklapen tasak handiagoa izan behar duela nabarmendu dute. Horretarako euren konpromisoa adierazi dute.
Erlazionatutako edukiaEdukiontzi marroia ezartzen hasi dira
