Don Boscoko elektronika sailekoek hiru proiektu aurkeztuko dituzte Zaragozan
Berrikuntza eta ikerketako Don Bosco Sarian hartuko dute parte ikastetxeko bost ikaslek
Don Bosco ikastetxeko elektronika saileko bost ikasle eta Andoaingo La Salle-Berrozpe ikastetxeko beste batek hiru proiektu aurkeztuko dituzte bihar eta etzi Zaragozan (Aragoi). Hiru irakaslek lagunduko diete Don Bosco Sari Nazionalaren XXVIII. ekitaldira.
Seigarren aldiz parte hartuko du Errenteria-Oreretako ikastetxeak sari horretan. Aurkeztuko dituzten hiru proiektutatik bi ikastetxean egin dituzte, eta bestea elkarlanean egin dute Andoaingo eskolarekin. Guztira, 60 proiektuk hartuko dute parte. Honakoak dira hiru proiektuak:
Osabot (Asier Martin eta Ion Eizagirre)
Giza itxurako robota da, 3D inprimagailuan egindakoa. Hirugarren adinekoei gimnasia irakasteko balio du, eta bluetooth bidez konektatuta dagoen mikrokontrolatzaile batekin maneiatzen da.
Balance Board (Daniel Aparicio eta Jon Ander Mateos)
Erretilu bat da, eta gainean dauden objektuek dardarak ez nabaritzeko diseinatuta dago. Zerbitzarientzako, oreka arazoak dituztenentzako edo Parkinsona bezalako gaixotasunak dituztenentzako sortu dute.
Nurse (Asier Duran eta Ion Munarriz)
Sendagaiak banatzen dituen prototipoa da. Interneti konektatuta dago, eta Google Calendar programa erabiliz kudeatzen du sendagaien banaketa. Banatzaileak dituen sentsoreen bitartez, sendagileak web bidezko jarraipena egiten dio gaixoari. Datu berriak jasotzean, Google Calendar berak egokituko lituzke aldaketak.
Hiru proiektu horiez gain, beste batzuk ditu abian elektronika sailak: ohiko testua braillen hizkuntzan inprimatzen duen inprimagailua, haurrak zaintzen dituen jostailu itxurako robota, rally-ko autoen denbora neurtzen duen sistema… Proiektu horiek guztiak, eta gehiago, maiatzaren 16rako antolatu duten DB-sariak-en ikus ahal izango dira.
Don Boscoko ikasleak euren proiektuekin
