PSE-EEk "gutxiegi" jarri dio Udal Gobernu Taldearen kudeaketari
Liburuxka bat banatzen hasi dira etxez etxe, agintaldiaren balantze ezkorra eginez
Errenteriako PSE-EE liburuxka bat hasi da banatzen etxez etxe, eta bertan agintaldiaren balantze ezkorra egin dute. “Bilduri gutxiegi bat jarri diogu”, esan du Jose Angel Rodriguez sozialisten alkategaiak. Kudeaketan “gabeziak” daudela esan du, eta “oposizioaren ekimenez” hainbat proiektu aurrera atera direla baietsi du.
“Eurentzat erosoak gaiei bakarrik” eman dietela garrantzia esan dute, eta horretan “dirua xahutu” dutela. Udalak egindako ikerketak, publizitatea, jaien kostua eta beste kritikatu ditu Rodriguezek. Kaleen egoera ere gaitzetsi dute: “Egungo irudiak ez du zerikusirik guk utzi genuenarekin”.
Udal Gobernu Taldeak atez atekoa nahi zuela adierazi dute, “ondoren derrigorrezko bosgarren edukiontzia eta azkenik boluntarioa jarri dute”. Esan dute euren alderdiari esker itxi dela San Markoko zabortegia, baita bertara joango den errepidearen konponketa ere. Horrez gain, gobernu taldeak proposatutako ordenantza fiskalak “diru bilketarako” zirela iritzi du.
Kritika gehiago zerrendatu ditu Rodriguezek: “Beraungo igerilekuen eta Fanderiako presaren obren atzerapena; kultura politikak aniztasuna murriztu duela; merkataritzari laguntza txikia; udalaren zorra handitu dute; eredu kulturala diru xahutze handia da…”. Bukatzeko, esan du Errenteria-Orereta gobernatzeko “beste modu bat” ezagutzen dutela: “Lan egingo dugu eraginkortasuna, gardentasuna eta benetako konpromisoa Alkatetzara irits dadin. Herritar guztientzako gobernatuko dugu”.
Isaac Palencia eta Jose Angel Rodriguez
