Musikeneko banda sinfonikoak kontzertua emango du larunbatean, Fatimako parrokian
Jose Rafael Pascual Vilaplanaren zuzendaritzapean ariko dira; EMKE eta Musikenek duten hitzarmenaren barruko ekitaldia izango da
Iazko otsailaren 1ean eman zuen Musikeneko banda sinfonikoak lehenengo kontzertua Errenteria-Oreretako Fatimako parrokian. Euskal Herriko goi mailako musika ikastegiak eta Errenteria Musikal Kultur Elkarteak elkarlanerako hitzarmenak ahalbidetu zuten hori. Esperientzia horren balorazio positiboa egin ondoren, aurten ere errepikatuko dute.
Horrela, larunbatean, banda sinfonikoak Fatimako parrokian joko du berriro, 20:30etik aurrera. Ibilbide handiko zuzendari batek, Jose Rafael Pascual Vilaplanak, zuzenduko du Musikeneko banda sinfonikoa. “Maila handiko zuzendaria da”, esan du Josu Mitxelena EMKEko presidenteak, “eta ohorea da bera herrian edukitzea, baita zuzenduko dituen ikasleentzako ere, didaktikoa izan daitekeelako”. Musikenerentzako hitz onak ere izan ditu: “Iazko kontzertuan konturatu ginen sekulako maila duela Musikenek, eta jakitun gara noraino irits daitezkeen. Orkestra eta bandentzako harrobi izango dira”.
Miren Iñarga Musikeneko zuzendariaren arabera, larunbatekoa “aukera ona” da musika ikasgeletatik ateratzeko. “Musikaren ikuspegitik, horrelako zuzendariekin egiten duten elkarlanak oso profesionalak dira”. Astebete egoten dira eurekin, eta asko ikasten dutela jakinarazi du Iñargak. Horrez gain, Pascual Vilaplanaren “alde humanoa” nabarmendu du: “Alde didaktikoa asko lantzen du, eta eurek duten onena ateratzen laguntzen die”.
“Ahizpa behartsuak”
Larunbateko kontzertua Musikeneko banda sinfonikoarekin egingo duen laugarrena dela gogorarazi du Pascual Vilaplanak. “Ez dut nahi ohiko kontzertu bat gehiago izatea, musika banden errepertorioa landu nahi nuen”, esan du. Gainera, arreta eskatu du bandentzako, “ahizpa behartsuak garela dirudielako. Ez gara asko agertzen kultura orrialdeetan, herri xehearentzako musika dela dirudielako”. Horregatik, Musikenek bandentzako musikari egindako keinua eskertu du. Gero kontzertuan joko dituzten lau obrak xehatu ditu. Lehenengo biak XX. mendeko lehen erdialdekoak dira eta beste biak bigarrenekoak:
Mitxelena, Pascual, Mendoza eta Iñarga, aurkezpenean
- Huntingtower (Ottorino Respighi, Franco Cesariniren moldaketarekin) 1932an estreinatu zuten Washingtonen, John Philip de Sousa omentzeko. Obra Irlandako gaztelu bati buruzkoa da, eta banden errepertorioko obra “mitikoa” dela esan du.
- Lincolnshire Posy (Percy Grainger) 1937koa da. Grainger “banden musikaren Bartok” dela esan du. “Grabagailu batekin banden musika grabatu eta moldaketak egiten zituen”, azaldu du. Jakinarazi duenez, obra horri buruzko doktoretza tesiak daude, eta bere ustez, banden musikak goia jo zuen obra horrekin: “Ordutik aurrera inboluzio bat egon zen. Egin ditugun entseguetan musikariak harrituta geratu ziren zuen modernotasunagatik”.
- Yosemite Autumn (Mark Camphouse) 2003an argitaratutako lana da. Musikagileen unibertsitate korrontearen eredu da, eta zinemako musikaren eragin handia du.
- Poema Alpestre (Franco Cesarini) 1992ko lana da Cesarini suitzarrarena. Poema sinfonikoa da, Alpeei eskainia. Thomas Mannen Mendi magikoa liburuan dago oinarrituta, eta Richard Straussen eragina du. Obra “erloju suitzarra” dela adierazi du.
