Duintasun Martxetara joateko deialdia egin du Oarso Taldeak
Martxoaren 21ean Madrilen egingo dute mobilizazioa; autobusak antolatu dituzte Oarsoaldean
Hilaren 21ean egingo dituzte Duintasun Martxak, eta Oarso Taldeak hara joateko deia luzatu du gaur eguerdian egindako agerraldian. Iaz egindako mobilizazioan izan ziren, eta adierazi dutenez, “egoerak ez du hobera egin, eta jendartearen gehiengoaren kontra Troikaren politikak gehitzen ari dira”.
Gaineratu dutenez, “PP, EAJ eta UPNren gobernuek krisia atzean uzten ari garela diote, baina muturrez aurre egiten du gehiengo sozialak pairatzen duen egoerarekin”. Horrela, Espainiako Estatuko langabezia tasa %24koa dela gogorarazi dute, eta Euskal Herrian 240.000 direla lanik gabe daudenak. “%40k ez du prestaziorik jasotzen, eta gazteen %55 lanik gabe dago”, gaineratu du Oarso Taldeak. Pentsioek urtetik urterako erosmen ahalmen txikiagoa ematen duela gaitzetsi dute.
Kritikatu dute gizarte zerbitzuetan egiten ari diren murrizketek bost herritarretatik bat pobrezia arriskuan jartzen duela, eta gaur egun %30 dagoela pobrezian murgilduta. “Euren etxeetatik kaleratzen dituzten pertsonen kopurua handituz doa, baita pobrezia energetikoa pairatzen dutenena ere”, zehaztu dute. Ustelkeriaren gorakadak ere larritzen ditu Oarso Taldeko kideak. “Hori guztia Espainiako Konstituzioaren 135. artikuluaren erreformaren ondorio da: herri subiranotasuna Europar Batasuna eta Europako Banku Zentralaren aginduetara utzi dute”. Horrela, “78ko erregimenaren eta konstituzioaren deskonposaketa begibistakoa” dela iritzi dute. Gainera, mobilizazio sozialei aurre egiteko legeak gogortu dituztela salatu dute.
Beraz, “duintasunaz bizi nahi dutelako”, Madrilera joateko gonbitea egin dute. Jakinarazi dutenez, hamar puntuko gutxieneko programa baten inguruan bilduko dira bertan:
Oarso Taldeak Duintasunen Martxara joateko deialdia egin du
- Zor “ilegala” ez ordaintzea.
- Guztientzako zerbitzu publikoak.
- Enplegu duina, eskubideekin eta nahikoa izango den soldatarekin; lanaldiaren murrizketa eta oinarrizko errenta.
- Erresumako pertsonek, herriek eta nazioek euren bizitza etorkizunari buruzko erabakiak hartzeko eskubidearen aitortza.
- Emakumeen eskubideen defentsa, baita gazteen etorkizunarena ere.
- Prekarietatearen eta lan erreformaren kontra.
- Errepresio eta Mozal Legearen kontra.
- TTIPren aurka.
- Etxebizitza duina; argia, ura, eta gasa bezalako beharrak ez moztea.
- NATO ez. Gerrarik ez.
