EAJk tokiko merkataritza sustatzeko bide berriak landu nahi ditu
Antxoko aparkalekuaren antolamenduak merkatari eta ostalariei kalte egin diela iritzi diote jeltzaleek
Nahikari Otermin alkategaiaren arabera, udalak gehiago lagundu eta babestu beharko luke tokiko merkataritza, eta jarduera dinamizatzeko formula berriak bilatu. Aitzitik, herriko eragile ekonomikoekin egin berri dituzten bileretan kexa asko bildu dituztela esan dute jeltzaleek.
Besteak beste, udalak ematen dituen “laguntzak beti berandu” iristen direla salatu dute, eta negozio berriak ireki nahi dutenei erraztasunak eman ordez zailtasunak jartzen zaizkiolako kexu agertu dira: “Horrelako egoera bat onartezina da, are gutxiago gaur egun”. Izan ere, EAJren arabera, merkataritzak eta ostalaritzak, aberastasuna sortzeaz gain, herri bati bizitza ematen baitiote.
Ekonomia aktibatzea, helburu nagusi
Pasaiako ekonomia sustatzea eta lanpostu berriak sortzea izango da EAJren lehentasuna hurrengo legegintzaldian. Horregatik, lanpostuak sortuko dituzten negozio berriak irekitzen dituztenei erraztasunak emango dizkiotela agindu du Oterminek. “Pasaiak udalerriaren suspertze ekonomikoaren aldeko eta tokiko merkataritzaren aldeko apustua egingo duen gobernu bat behar du, pasaitar guztiei Pasaia oparo bat, etorkizunerako prest egongo dena eta aukera eta enplegu berriak eskainiko dituena eskaintzeko”, gaineratu du.
Antxon, aparkatzeko zailtasunak
EAJren arabera, Antxon aparkatzeko sistema berria indarrean ezarri denez geroztik “arazoak ari dira sortzen bisitarien eta Antxoko egoiliarrak ez diren pasaitarren artean”. Egoera merkatari eta ostalarientzat oso kaltegarria dela iritzi diote, jeltzaleen arabera “zailtasun handiak” daudelako “aparkatzeko eta izapideak egiteko”.
EAJren iritziz, “herritarren eta Antxora hurbiltzen diren gainerako pasaitarren eta bisitarien aparkaleku-beharrei erantzungo dien formula bat landu behar” da, sistema berriak “ez duelako arazoa konpondu”. Horregatik, “bisitariak eta Pasaiako gainerako herritarrak diskriminatuko ez dituzten konponbideak” bilatzearen alde egin dute, “betiere merkataritza eta ostalaritzaren sektorea kaltetu gabe”.
