500 sinadura behar dituzte hautagaitza aurkeztu ahal izateko eta 300dik gora lortu dituzte jada
Udalaren zorra aztertzeko kanpo auditoria eskatzea izango da Pasaia Ahal Du hautagaitzarentzako helburu nagusienetakoa udal hauteskundeetan ordezkaritza lortzekotan. Lehengo astean aurkeztu zuen Pasaia Ahal Du-k hautagaitza, Trintxerpeko alkateordetzan, eta han eman zituzten ezagutzera beren lan lerro estrategikoak, Nerea Bastardo Garcia alkategaia buru zutela.
Bastardo Garciak esan zuenez, “udalerrian betikotu diren arazoei irtenbidea ematea” da beren helburua, “alderdi tradizionalek konpondu ez dituzten arazoei irtenbidea emanez”. Hondakinen kudeaketaren ingurukoak edota aparkalekuarenak aipatu zituzten konpondu beharrekoen artean.
Sinadurak biltzen
Pasaian erroldatutako 500 lagunen sinadurak behar ditu Pasaia Ahal Du-k hautagaitza aurkeztu ahal izateko, eta horretan ari dira egunotan barrutiz barruti. Esan dutenez, honez gero 300dik gora sinadura bildu dituzte.
Beren zerrenda “herritarrek herritarrentzat” egina dela nabarmendu dute, eta “hala nahi duten pasaitar guztiek hautesle eta hautagai izateko eskubidea izango dutela”.
Pasaia Ahal Du-ren iritziz, “pasaitarrek erabakitzeko eskubidea berreskuratu behar dute, Pasaiako Udalaren pasibotasunaren gainetik”.