Trenari galga jartzeko asmoz
AHTaren Astigarraga-Oiartzun-Lezo proiektua jendaurrean dago. Alegazioak biltzen ari dira trenaren kontra dauden taldeak, eta astelehenean aurkeztuko dituzte.
Hirugarren erraila jartzen ari dira Gaintxurizketan
Horretan dabil buru-belarri Mikel Alvarez. Gogorarazi duenez, Astigarraga-Lezo-Oiartzun linearen egungo diseinua ez zen jatorrizko proiektuan egina zegoena. “Superportuaren bultzatzaile izan zen Jaizkibiaren eskema bat da gaur egungo proiektua. Alternatiba horrek aipamen egiten du superportuari zein plataforma logistikoari ateak zabalduko lizkiokeela”, adierazi du Alvarezek. Aldaketa hori dela eta, berriro hasi behar izan dute tramitazioarekin. Orain dela bi urteko udaberrian Ingurumen Kontsulta Dokumentua osatzeko iradokizunak eskatu zizkieten udalei. “Adierazgarria da”, esan du Alvarezek, “Lezoko Udalak salaketa irmoa egin zuela”. Orduan, Eusko Jaurlaritzak udalari zazpi orrialdeko laburpena bidali zion. “Proiektua prentsan eta guzti azaldu zen, eta udalari azterketak eskatuta, laburpentxo hura bakarrik eman zioten, informazio murrizketa larria eginez”, gaineratu du.
Bost zatiko alegazioa
Bost oinarri ditu AHTrik nahi ez dutenen eragileen alegazioak. Lehena, suposatuko lukeen “txikizioa” izango litzateke. “Linea zatiaren hasieran, Martuteneko ibarrean, bost trazatu egingo dituzte, ohiko trenbidearekin lotzeko”, jakinarazi du Alvarezek. “Goitik behera suntsituko luke Donostiako baratzea“, gaineratu du. Ondoren, San Marko zeharkatu, Zamalbide, Oiartzungo industriaguneak pasatu eta Gaintxurizketainokoa izango litzateke bidea. Alvarezen esanetan, “hondamena” ekarriko lioke inguruari, eta Lezoren nekazaritza eremu den Gaintxurizketa inguruan izango lukeen nabarmendu du. “Azpiegituren metaketa are handiagoa” egongo litzatekeela salatu du, eta AHT industriaguneei zein bigarren gerrikoari eta beste errepideei batuko litzaiekeela. Azpiegituren metaketa horren harira, alegazioaren bigarren oinarria da Pasaiako kanpoko kaiari eta Gaintxurizketako plataforma logistikoari bide emango liokeela.
San Marko eta Zamalbide ingurua Donostiako Martutene auzoa eta 27 industriagunea pasatu ondoren, San Marko menditik pasatuko litzateke tunel bat, 2.880 metrokoa. Isatse baserriaren ondoan bukatuko da. Masti-Loidi eta Egiburuberri industrialdeen artetik pasatuko litzateke, eta bigarren gerrikoa gurutzatuko luke azpitik, 200 metroko tunelarekin. Gurutzearen Alabak eskola azpitik beste bat egingo lukete.
Hirugarren oina, berriz, “justifikazio falta” da. “Udalei azterketa informatiboaren dokumentazioa bidali diete, Renferen trenbide zabalera gehi zabalera europearra jasoko dituen hirugarren errailari buruz”, azaldu du Alvarezek. 2011n, Astigarraga eta Irun artean, hirugarren erraila eraikitzea erabaki zuten, bidaiariak Atotxako geltoki birmoldatura bideratzeko. Horrek Astigarragako geltokia egitasmotik kentzea suposatuko zuen.
Oiartzunen, biaduktuak Merkaoiartzun eta inguruko pabilioien gainetik, 650 metro luze eta 32 metro altuko biaduktua eraiki nahi dute. Ugaldetxon hiru adar egingo lituzkete: bat, Irunera joango den bide nagusia, eta beste bi, Gaintxurizketa aldera merkantzia eramateko bi errail. Bide nagusia Arkale azpitik joango litzateke. Beste biak Lanbarren gainetik pasatuko lirateke 800 metro luzeko bidauktuan. Hiru bideentzako Goiko Eskola inguruan tunel bana egingo dituzte.
“Azterketa informatiboan azaldu dutenez, ohiko trenbideak gaitasuna izango luke, hipotesi gaindimentsionatuenean, trafiko guztia eramateko”, jakinarazi du. Egingo ez den Iruñeko konexioa edo eguneko 162 merkantzia tren kontuan hartzen dituzte hor. Alvarezek zehaztu duenez, Jaurlaritzako Obra Hidraulikoen zuzendaritzak zein aldundiak ere, Espainiako Sustapen Ministerioari eskatu zioten hirugarren errail mixtoa egiteko, “horrek azpiegitura gehiago beharko ez lukeelako. Eta txostenak berak ere aitortzen dio gaitasun hori”.
Gainera, AHT Ipar Euskal Herriarekin batuko lukeen lehen zatia izango litzateke, baina Frantziako Gobernuak 2032ra arte atzeratu izana hango tren lasterra ere arrazoizko pisua izan daitekeela aipatu du.
Gaintxurizketan, lotura Gaintxurizketan, etorkizunean eraikiko litzatekeen plataforma logistikoarekin bat egingo lukete Oiartzundik datozen bi errailek.
Astigarraga-Gaintxurizketa bidearen kostua ere sartu dute alegazioan. Kilometro gutxiko ibilbide horrek 440 milioi euroko aurrekontua luke, “baina horrelako proiektuak puztu egiten dira”, ohartarazi du Alvarezek. Diru hori premia sozialei erantzuteko erabiltzea eskatu dute.
Azkeneko puntuan, berriz, proiektuaren beraren gelditzea eskatu dute. “Azpiegitura horiek lurraldean zein gizarte ereduan duten eraginak ikusita, herritarren ahotsa entzungo den parte hartze prozesuak jarri beharko lirateke abian”, iritzi du Alvarezek.
11:00
Alegazioen aurkezpena
Astelehenean alegazioak aurkeztuko dituzte Espainiako Gobernuak Donostian duen ordezkaritzan, 11:00etan. Ondoren kontzentrazioa egingo dute AHTren erokeria gelditu lemapean. Sinadurak ere jasoko dituzte: gaur, 19:00etatik, Lezoko Txerrimuñon izango dira, eta bihar Errenteria-Oreretako Niessenen, 11:00tatik 13:30era. Oiartzungo Goiko Eskolan ere jasoko dituzte sinadurak. Erakundeen aldetik, Oiartzungo nahiz Errenteriako udalek alegazioak aurkeztuko dituztela esan dute.
