Errenteria-Oreretak "aldaketa" behar duela aldarrikatu du PSE-EEk
Sozialistek adierazi dute 700 proposamen inguru jaso dituztela, eta "gehienek" garbitasunarekin dute zerikusia
Errenteria-Oreretako PSE-EEko alkategai Jose Angel Rodriguezek adierazi duenez, herritarren 700 proposamen jaso dituzte euren programa egiteko, eta adierazi dutenez, kexa gehien jaso duen gaia udalerriak duen “garbitasun eza” da. “Bilduk eta Ezker Anitzak ez diote gai horri garrantzirik eman”, salatu du. Rodriguezek beste hainbat gai zerrendatu ditu, “hobetzeko” asmoa dutenak: “Aparkaleku falta, segurtasuna, hiri-altzarien mantenu eza, irisgarritasuna, bosgarren edukiontzia, gizarte hobekuntzak eta langabezia”.
Alkategai sozialistak esan duenez, jaso dituzten iradokizunak “eraikitzaileak” direla, eta euren ideiekin bat datozela. “Zin egiten dugu gure proiektuak ez duela ez duela udalaren diru kutxa kaltetuko, eta ez dugu gure hiria zorpetuko”, gaineratu du. Rodriguezentzat “oso garrantzitsuak” dira datozen hauteskundeak, herritarrek “aldaketa edo betiko gauza berbera” hautatu behar dutela esan du: “Inposatzen dutenen edo elkarrizketaren alde gaudenen artean, baztertu edo gehitzen dutenen artean hautatu behar dute herritarrek. Bilduk gobernatzea edo aldaketa bat aukeratu beharko dute. Arduraz eta erantzukizunez betetako aldaketa eskainiko du alderdi sozialistak”. Nahi batekin bukatu du prentsa oharra Rodriguezek: “Errenteria etorkizunez betetako hiria izatea nahi dugu, agintaldi honetan jaso duena baino gehiago merezi duelako”.
