Igandean 700 lagun desagertu ziren Mediterraneoan; Aniztasun batzordeak ere bat egin du elkarretaratzearekin
Oarsoaldeko SOS Arrazakeriak Europako Batasunaren (EBren) immigrazio politika salatuko du bihar arratsaldean. Elkarretaratzea egingo dute Xabier Olaskoaga plazan (Niessenen), 19:00etan.
Asteburuan mila lagunetik gora desagertu dira Mediterraneo itsasoko uretan, eta hori salatuko dute, baita urtero EBren mugetan gertatzen diren heriotzak ere.
EB jo du heriotzen errudun gisa, “EBk bere lurraldean sarrera ukatzen dielako asilo eta babes bila datozen pertsonei”. Horrela, Oarsoaldeko SOS Arrazakeriak salatu du EBk pertsonekin trafikatzen duten mafiei botatzea errua: “Baina nork du errua? Politika komunitarioek, ez dutelako beste biderik uzten bertara iristeko”.
Horrela, agintariei eskatu diete naufragio arriskuan daudenak erreskatatzeko baliabideak jar ditzaten. Ez hori bakarrik: jatorriko herrialdeetan sartzeko bisen politika aldatzea eskatu dute, baita Dublin III ituna ere. Laburbilduz, mugen itxieraren “errotiko aldaketa” eskatu dute, Mediterraneoa zirkulazio askerako eremua izanez. “Hori ezinbestean iritsiko da. Baina bitarte horretan sortuko diren biktimak aldaketa eragozten duten politikarien ardura izango da”, gaineratu dute.
Aniztasun atalak bat egin du
Errenteriako Udaleko Aniztasunaren kulturako eta garapenerako lankidetzako atalak ere bat egin du biharko elkarretaratzearekin. “Afrikako eta Ekialde Erdiko gune handi batean ari den gatazka egoerek, gehi goseak eta miseriak”, gogorarazi du Aniztasun atalak, “eragin zuzena du ehunka pertsonek euren bizia arriskuan jartzea”.
Herritarrei esan diete ez dezatela egoera “saihestezin” gisa hartu, eta “etorkizunean aukera bat izateko dena arriskatzen diren pertsonekin solidarioak izateko”.