Oarso-Bidasoko langileak deitu dituzte maiatzaren 1ean egingo den manifestazioan parte hartzeko
Maiatzaren Lehena gertu da, eta Oarso Bidasoko LABek langileei dei egin die egun horretan egingo diren mobilizazioetan parte har dezaten. Horrela, Errenteria-Oreretan manifestazioa egingo dute 12:30ean hasita, Gamon Zumarditik.
Langileok borrokan, Euskal Herria aldaketa bidean goiburua izango du mobilizazioak. LABen ustez, maiatzaren 1ean langileek “ospatzeko ezer” ez dute, “baina badugu zertaz harro egon”. Horrela, harrotasun hori kalera ateratzea eskatu dute.
Gaineratu dutenez, leloaren aukeraketa ez da ausazkoa, “errealitate bat” da. “Langileok ateratzen dugu Euskal Herria
Maiatzaren Leheneko deialdia egin du gaur LABek
aurrera, eta langileok egindako borrokari esker herri hau aldaketa bidean jartzea lortu dugu”. Aurten lan eskubideen eta sozialen defentsan ari diren langileak omendu nahi ditu sindikatuak, “langilerik gabe ezin delako herri bat aurrera atera”.
Hauteskunde atarian egonda, sindikatuak alderdi politikoentzako hitz gogorrak izan ditu. “Lotsagarria da”, esan dute, “milaka lanpostu suntsitu dituzten agintariei enpleguaren sorrera eta defentsa aldarrikatzen entzutea”. Nabarmendu dute langileak “bakarrik” egon direla “finantza sistemak eta multinazionalek erabakitako politika ankerrei aurre egiten”. Lan merkatuan dagoen prekarietatea, langabezia eta pobrezia “izurrite” gisa definitu dituzte. “Baina ez gara horrekin konformatzen: bestelako eredu sozial, politiko eta ekonomikoaren eraikuntzan ari gara”.
LABek, 40 urte
Aurten sindikatua urteurren biribila ospatuko du, eta “askapena ekarriko digun bidean” egindako ekarpenarekin “harro” daudela berretsi dute. “Etorkizunera begira” jarri nahi dute, eta eredu berriaren eztabaidan, “hazi eta indartzen jarraitu” nahi dute. Horretarako, sindikatua eta sindikalgintza “eraberritu” behar dela uste dute.
Oarsoaldeko zein Bidasoko langileei kalera ateratzeko deia luzatu diete, “garai gogorrak” diren arren. “Arduraz, ilusioz eta konpromisoz bidea egiten jarraitzea dagokigu”, gaineratu du sindikatuak. “Ez dugu honaino borrokatu orain etsitzeko. Langileon Euskal Herria dugu helburu eta ez dugu amore emango lortu arte”, baietsi dute.
Maiatzaren Leheneko manifestazioaren ondoren, bazkaria antolatu dute Ernai eta Sorturekin batera. Koldo Mitxelena ikastetxeko jolastokian izango da. “Langileen harrotasuna belaunaldi ezberdinak batzen” islatuko dute. Txartelak Errenteria-Oreretako Landare tabernan egongo dira salgai, baita LABen egoitzan ere (Nafarroa etorbidea, 61, 2A. Errenteria-Orereta). Langileentzako prezioa 12 euro izango dira, eta diru sarrerarik ez dutenentzako, sei.