Gaur aurkeztu dute EH Bildu Beraun; hauteskundeei begira, ezkerreko indarrik "eraginkorrena" direla esan dute
Orain dela bi hilabete inguru, Orereta/Errenteriako EH Bilduk barne hausnarketa egin zuen, eta auzo taldeak sustatzearen erabakia hartu zuen. Hainbat auzotan esan eta egin dute. Tartean, Beraunen. Gaur aurkeztu dute publikoki ezkertiarrak eta soberanistak batzen dituen auzoko taldea, Beraungo
erdigune den Pablo Sorozabal plazan.
Bazegoen gobernatzeko beste modu bat, eta EH Bilduk posible zela erakutsi du lelopean egin dute ekitaldia.
Duela lau urteko aldaketari “Bai” esan diote
Luis Garridok hartu du hitza, eta nabarmendu du auzoko jendeak osatzen duela taldea. “Orain dela lau urte ilusioz bizi genuen aldaketa politikoa, alderdi sozialistaren 28 urteko gobernuen ondoren”, esan du Garridok. Bukatzear den agintaldian gobernatzeko “beste era bat” argi geratu dela uste du: “Modu irekian, gertutasunarekin, gardena eta eraginkorra izan da”. Adibideak jarri dituzte: auzo elkartearekin egindako bilerak eta auzo batzarretan jasotako proposamenak “jasotzea eta gauzatzea”. Bide horretan, auzoak “eraldaketaren bidean” protagonista izaten jarraitu behar duela aldarrikatu dute, eta datozen urteetan EH Bildu buru duen gobernu “ezkertiar eta aurrerakoiaren” alde egin dute.
PSE-EEren jarrera ere kritikatu dute. “Eskuineko frontea osatu dute EAJ eta PPrekin”, iritzi du Garridok, “eta ezezkoaren blokea osatu dute fiskalitatean, ingurumena edo parte hartzearekin”. EH Bilduren hauteskunde zerrenda babestu dute, besteak beste, “gure auzoko bi lagun zerrendaren goiko aldean aurkitzen baitira”.
Bozkatuenak izatea, amets
Ritxar Martinezek, bere aldetik, azaldu du euren helburua Beraunen “zerrenda bozkatuena” izatea dela. EH Bilduk auzoarekiko “apustua” egin duela esan du: “Heziketa eta kirol instalazioetan inbertsioak egin dira, ludoteka berria, igerilekuetako aldagela eta kafetegi berria…”. Horri batu dizkio San Markoko zabortegiaren zigilatzean lagundu izana, bertarako errepidearen hobetze proiektua edota Sarriegi plazan dauden itokinak konpontzeko diru partida.
Hala ere, zehaztu “asko dagoela egiteko”, eta eurek lanean jarraituko dutela. Auzokideen eskariak jasotzen jarraituko dute, eta horretarako
facebook orrialde bat,
twitter kontua eta
e-posta helbidea sortu dute. Halaber, maiatzaren 3an Pablo Sorozabal plazan mahaia jarriko dute.