Jose Angel Rodriguezek alkategai sozialistak webgunea aurkeztu du

Hilabete eskas falta da hauteskundeetarako, eta epe horretan euren webgunean 30 proposamenak aurkeztuko dituzte

2015/04/24

Rodriguez, bere webgunea aurkezten

Hauteskundeetarako hilabete eskas falta da, eta hautagaiak motorrak berotzen hasi dira. Horrela, Jose Angel Rodriguez PSE-EEko alkategaiak gaur aurkeztu du bere webgunea. Alkategaiak adierazi duenez, webgunea “xumea, hurbilekoa, irekia eta atsegina” da. Hizkuntza “erraza eta praktikoa” dela gaineratu du. Edukiei dagokienez, hautagaiari buruzko informazioaz gain, hautagaitzako kideena ere agertzen da. “Egun ditugun beste informazio bideen —udalerriko PSE-EEren webgunea eta Gipuzkoakoa— osagarria da”, esan du Rodriguezek. Hori bai, zehaztu du euren ekimenez sortu dutela webgunea, eta “aitzindari” direla. Edukia zerrendatzen jarraitu du Rodriguezek, eta argazkiak, harremanetarako bideak, legegintzaldirako proiektua —maiatzaren 8tik aurrera jarriko dute— izango ditu webguneak. Gainera, egunero proposamen bat jakinaraziko dutela esan du alkategai sozialistak. Pixkanaka ariko dira edukiak berritzen, eta orain arte bildutako albisteez gain, berriak ere sartuko dituzte. Irakurketa politikorako unea ere hartu du Rodriguezek. Hauteskundeetan zerrenda bozkatuena izan nahi dute, euren helburuak gauzatzeko: “Errenteriak aldaketa merezi du, eta horrengatik borrokatuko gara. Hiri hobea, solidarioagoa, formatuagoa eta garbiagoa behar dugu”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.