Maiatzaren Lehena kaleak hartzeko izan dadila dei egin dute
ESK, LKN, CNT, Steilas eta Co.Bas sindikatuek zein Oarso Taldeak Errenteria-Oreretatik Donostiara joango den martxa antolatu dute
Ate joka dago Maiatzaren Lehena, eta hainbat sindikatu eta eragile sozialek badute ostiralerako mobilizazio plana. Gaur goizean Errenteria-Oreretako hainbat taldek eurek antolatu dutena jakinarazi dute. Horrela, ESK, CNT, LKN, Steilas eta Co.Bas sindikatuek zein Oarso Taldeak martxa bat antolatu dute Errenteria-Oreretatik Donostiara. 09:45ean irtengo dira Gamon Zumarditik, eta 12:00etan Donostiako Bretxatik aterako den manifestazioarekin bat egingo dute.
Eragileetako ordezkariek adierazi dutenez, aurtengoa susperraldi ekonomikoaren “urte ofiziala” izango da. Euren esanetan, baina, langileek “ez dute ospatzeko ezer ere ez, gezurra delako ezer ospatzeko dugula”. Izan ere, azken urteetan gobernuek egindako erreformek ugazabak “oilartu” dituela esan dute, “eta epaitegietan hala frogatu diren legez kanpoko kaleratzeak egin dituzte”. Gainera, sistema publikoa “erasotzea” ere salatu dute. Hezkuntzari dagokionez, LOMCE eta Herriberri kritikatu dituzte, “izaera kritikoa duten pertsonak trebatzeko helburutik urruntzen dituztelako, eta ideologia neoliberala hedatzen duelako”. Hezkuntza eredu hori TTIP bezalako hitzarmenak ezartzeko erraztasunak sortzen dituela gaitzetsi dute.
Neurri horiek guztiak —eta beste— “kapitalaren mesedetan” egiten dutela adierazi dute. “Horien kontra matxinatuko bagina, gainera, Mozal Legea dute”, esan dute. Nabarmendu dute “susperraldiaren urte miragarrian, mileurista bezalako terminoak zaharkituta” geratu direla. Etxeko langileen kasuan, “esklabotza” egoera handitu dela esan dute.
Horregatik, Maiatzaren Lehena probestuko dute “langileon erantzun ahalmena handitzeko, borrokaren beharraren lekukotasuna egiteko egunez egun prekarizatuago dagoen lan eta gizarte mundu erantzun gisa”. Krisi urteek sistema kapitalista eta heteropatriarkalean “irtenbiderik ez dagoela” utzi diete gizarte eragile eta sindikalei: “Planetaren suntsiketa eta esplotazioa suspertzen ditu, generoen arteko desberdintasunean sustatzen da emakumeek egiten dituzten lan erreproduktiboak ikusezin bihurtuz”. Sistemak munduko ondasunen erdiaren jabe den %1ari mesede egiten diela argi utzi nahi izan dute.
Horri aurre egiteko, ondasun eta lanaren “banaketa erradikala” aldarrikatu dute, “berdintasunean oinarritutako jendarte bidezkoago bat ekarriko duena”. Ardatz gisa bizitza bera, eta ez merkatua, mahi dute. “Ez gaitzaten engaina”, ohartarazi dute, “hau ez ekonomia krisia, zibilizazioarena baizik”. Horregatik, ostiralean kaleak hartu behar direla berretsi dute, egungo sistemarekin bukatzeko “borrokan jarraitzen dugula jakin dezaten”.
Maiatzaren Leheneko martxa aurkeztu dute
