Agintaldiaren balantze "positiboa" egin du Ezker Anitzak
Datorren udal hauteskundeetan Errenteria Irabaziz babestuko duela adierazi dute
Agerraldia egin du gaur goizean Ezker Anitzak, bi helbururekin. Alde batetik, bukatzear den agintaldiaren balantzea egiteko, eta bestetik, Errenteria Irabaziz hautesle elkargoari babesa emateko.
Jose Manuel Ferradas koalizioaren egungo zinegotzi bakarrak hartu du hitza lehendabizi. Horrela, EH Bildurekin batera osatu duen Udal Gobernu Taldearen balantzea “positiboa” izan dela esan du. “Aurreko agintaldian, PSE-EEk eta EAJk osatu zuten gobernuak ez zuen ez helbururik ezta programarik. Gobernu aldaketa haize freskoa izan da herriarentzat”, gaineratu du. Egindako gauza guztiak zerrendatu baino, “luzea delako”, nahiago izan du Errenteria 2025 plan estrategikoa nabarmendu: “Herritarrekin egindako eta partekatutako bide orria izan da”.
Ezker Anitzak Ingurumen eta Mendi Saila zuzendu du, baita aniztasunaren kulturaren eta garapenerako lankidetzako azpisaila ere. Lehenari dagokionez, “ia desagertzetik egotetik”, azaldu du Ferradasek, “agintaldiko ikur izatera pasatu da”. Horrela, egindako lanak “fruituak ematen” jarraituko duela uste du, eta landa eremua “ongi zaindu” dutela gaineratu du. Azpisailaren kasuan, aurreko legegintzaldian “bueltaka” ibili dela esan du, eta agintaldi honetan finkatu dela. “Etorkizunean garrantzi handiagoa izango du”, iragarri du.
Kudeaketa hutsaz gain, “ahotsik gabekoen bozgorailu” izan direla aldarrikatu du Ferradasek: “Etxegabetzeak jasan dituztenak zein aurrezkiak arriskuan ikusi dituztenak babestu ditugu”. Errepublikazaletasuna eta laizismoa mahai gainean jarri izana ere bere koalizioari aitortu dio. “Zinegotzi bakarra izatea eraginkorra izan dela esan dezakegu”, bukatu du.
Jose Cruz Legorburuk hartu du, ondoren, hitza. Ezker Anitza, bere horretan, hauteskundeetara ez dela aurkeztuko adierazi du. “Koalizioarekin harremana dugun pertsona batzuek Errenteria Irabaziz sortzen aritu gara”, zehaztu du. Hasieran iniziatiba politiko zena orain hautesle elkargo bilakatu da.
“Gauzak aldatzearen alde gaudenon zein herritar batasunaren adierazpena da Errenteria Irabaziz”, gaineratu du. Euren ustez, batzeak indarra handitzea suposatzen du. Horrela, hautesle elkargoa gauzak aldatzeko “tresna erabilgarria” izango dela esan dute. “Gauza publikoa berreskuratu nahi dugu, eta udal politikak bideratzeko medioak nahi ditugu, gizarte, ekonomia, ingurumen eta kultura eskubideak bermatzeko”, adierazi du. Enplegua eta gizarte iniziatiba sustatu eta “gehiengo sozialaren” nahiei erantzuteko Errenteria Irabaziz-en aldeko apustua egin dute. Azkenik, foru hauteskundeetarako Gipuzkoa Irabazi hautagaitza babestuko dutela jakinarazi dute, eurek, Equok eta Alternativa Republicanak osatutakoa.
Agintaldiaren balantzea egin du Ezker Anitzak
