Malagako 44 ikasleri harrera egingo die gaur Lezoko Udalak
Lezo Institutuko ikasle eta familiekin izango dira ostirala arte paisaia eta gaitasun linguistikoaren gaineko proiektu baten barruan
Malagatik heldutako 44 ikasle Lezo Institutuko ikasle eta familiekin izango dira ostirala bitartean. Madrilgo (Espainia) Gobernuak sustatutako hezkuntza proiektu baten harira daude Archidonako (Malaga, Espainia) Luis de Barahona de Soto Institutuko ikasle horiek Lezon, Paisaia eta gaitasun linguistikoak proiektuaren harira, hain zuzen ere. Aurretik beste astebete eman zuten Lezo Institutuko beste hainbeste ikaslek Archidonan, apirilean zehazki.
Pasaiako Badia eta Jaizkibel magala olibondoen paisaiarekin aldatu zuten orduan Lezo Institutuko ikasleek, Imanol Iraola Gizarte Zientzietako irakasleak eta proiektuaren arduradunak Lezo Institutuan esan duenez: “Kontrastea izugarria da, handia eta esperientzia izugarri aberasgarria izaten ari da bai gure ikasleentzat eta baita Archidonakoentzat ere. Beraien artean harreman polita sortu da”.
Bisita ugari
Atzo heldu ziren Malagatik Lezora eta Lezo Institutuko irakasleek, ikasleek eta gurasoek Gezalan lehen harrera ez ofiziala egin ostean, gaur Ainhoa Zabalo alkateak harrera ofiziala egingo die 44 ikasleei udalean gaur 20:00tan. Malagatik heldutako 3. DBHko ikasleek agenda betea izango dute gainera hemendik eta ostirala arte Iraolak esan duenez. Lezokoa oso aberasgarria dela zehaztu du Iraolak, “Paisai industriala eskaintzen duelako udalerriak, baina baita itsasoa”.
Halere, ez dira Lezora mugatuko. Bihar bertan Goierrira joango dira bisitan eta besteak beste, Ezkio Itsasoko Igartubeitia baserria eta Ordiziako azoka ezagutuko dituzte eta baita CAF lantegia ere. Ostegunean berriz, Bilbo eta Portugaletera joango dira. Paisaia industriala ikusiko dute baina baita landa paisaiak.
Albaolara bisita
Bihar arratsaldean Donibanetik San Pedrora txalupan pasa eta Albaola bisitatuko dute. Iraolak bai Archidona zein Lezoko familiek eta baita bi udalerrietako udalek izan duten jarrera ere nabarmendu du: “Erabat inplikatu dira bai familiak zein Archidonako eta Lezoko udalak eta eskertzekoa da benetan”.
Ostegun iluntzean afaria
Ostegun iluntzean giro berezia sortuko dela Lezon ere esan du Iraolak. izan ere afaria antolatu dute eguraldiak laguntzen badu Saldise plazan. Bertako ikasle eta familiak eta etorritako ikasleak bilduko dira bertan musikak lagunduta, “giro paregabea sortuko da zalantzarik gabe”.
