Zuberoako Basaburua eta Eperra eta Haurtzaro ikastolen arteko elkarlan hitzarmena sinatu dute, ikasle, irakasle eta gurasoen harremanak indartzeko asmoz.
Udalbitza eta Haurtzaroren arteko hitzarmena sinatu dute
Zuberoako Basaburua (Aloze) eta Eperra (Sohüta) eta Haurtzaro ikastolen arteko elkarlan hitzarmena sinatu dute gaur goizean, ikastoletan lehena izan da Oiartzungoa. Hitzarmenaren helburua hiru ikastoletako ikasle, irakasle eta gurasoen artean, harremanak indartzea da. Mertxe Aizpurua Udalbiltzako eta Euskal Garapen eta Kohesio Fondoko lehendakariak eta Koldo Tellitu Euskal Herriko Ikastolak Europar Kooperatibako lehendakariak izenpetu dute bi erakundeen arteko hitzarmena.
Aizpuruak hitzarmenaren garrantzia nabarmendu du: “Euskal Herriaren etorkizunean berebiziko garrantzia du lurralde osoan hezkuntza kalitatezkoa eta euskalduna bermatzeak eta ikastolen arteko harremana indartzeak. Horregatik gure poztasuna agertu nahi dut Udalbiltza eta Ikastolen elkartearen arteko elkarlana posible egingo duen lankidetza hitzarmenagatik”. Koldo Tellitu pozik agertu da hitzarmenarekin: “Ziur gaude Elkarrekilan Euskal Herria proiektuak Elkarrekilan Zuberoan proiektuaren adinako arrakasta izango duela. Eperra, Basabürü eta Haurtzaro ikastolak ditugu lehenak. Sohüta, Aloze eta Oiartzun. Gaurtik bertatik, ikastola guztiak gonbidatzen ditugu parte hartzera, harremanak eraikitzera, lurraldeak euskaraz lotzeko zubiak egitera”.
Egingo dituzten ekimenak
Hauek izango dira ekintzak: hiru ikastoletako ikasleen artean trukaketak antolatzea. 2014-2015 ikasturtean, Haurtzaro ikastolak, Basaburua ikastolako ikasleei eginen die harrera lehen esperientzia gisa. Hitzarmena sinatu den unean, Zuberoako 22 ikasle bertan dira hain zuzen ere. Hiru ikastoletako irakasleen artean, trukaketak antolatzea. Hiru ikastolen arteko gurasoen trukaketak antolatzea. Hau adibidez, Mauleko besten karietara antolatu daiteke, haur eta gurasoen arteko egun bat martxan jarriz. Hiru ikastolen artean, bi lurraldeetako geografia, historia, kultura, produktu lokalak… ezagutaraztea. Hau adibidez, Haurtzaro ikastolan, Zuberoako produktuak ezagutarazteko egun berezi bat antolatuz gauzatu daiteke. Hiru ikastolen artean kirol arloko torneoak antolatzea.