"Gipuzkoako alkate" izan nahi duela berretsi du Denis Itxasok
Alkate sozialista izandakoekin agerraldia egin PSE-EEren ahaldungaiak; tartean zen Miguel Buen
PSE-EEko ahaldungai Denis Itxasok agerraldia egin du goizean, Gamon Zumardia eta Zubiaurre kalea lotzen dituen zubian, Gipuzkoan alkate sozialista izan zirenez inguratuta. Bertan ziren Miguel Buen udalerriko alkate izandakoa, Bixen Itxaso —Pasaiako alkatea ohia—, Anton Arbulu —Zumarragakoa—, Iñaki Arriola —Eibarkoa—, Alberto Buen —Irungoa— eta Odon Elorza —Donostiako—.
Azken horrek hartu du hitza, eta gainontzeko alkateek zein falta zirenen lana aitortu du. “Euren udalerrien eraldaketaren alde lan handia egin dute. Gainera, momentu oso gogorrak bizi izan dituzte, eta beti giza eskubideen alde egin dute”, esan du Elorzak. Gainera, nabarmendu du duela urte batzuk ezin izango luketela horrelako bat egin Errenteria-Oreretan, “indarkeriak zigortua zegoelako”. Itxasori babesa eman dio alkate sozialisten izenean, eta lurraldea birgaitzea eskatzeaz gain, “birgaitze morala” eskatu dio Itxasori: “ETAri zilegitasuna kentzen jarraitu behar diogu, eta ezin da gainontzeko terrorismoekin alderatzen jarraitu. Argi eta garbi hitz egin behar da, sozialistok egin dugun bezala”.
Ondoren, aginte makila eman diote alkateek Itxasori. Ahaldungaiak esan du euren alkatetzen ispiluan begiratzen duela. “Ohorea da zuen kudeaketaren oinordeko izatea”, gaineratu du. Esker oneko hitzak izan ditu alkate izandakoentzako: “Zuen esfortzuari esker bakean bizi gara, eta gure udalerriak oparoagoak eta modernoagoak dira. Alkate ohi zareten arren, niretzako beti izango zarete alkate”. Berak “Gipuzkoako alkate” izan nahi duela esan du, udalerrietako kargu gorena delako herritarrek hurbilen dutena.
Banan-banan zerrendatu ditu bertan zeuden alkateen lana. Buenen kasuan, Errenteria-Oreretaren “eraldaketa ekonomikoa” aitortu dio, eta Esmalteria, Lanera, Masti-Loidi edo Txirrita-Maleoren kasuak aipatu ditu. Oarsoaldeko beste alkate ohiarengatik —bere anaia Bixen— esan du Pasaiarentzako etorkizun berria nahi zuela, “baina ezetzaren plataformarekin topatu zen aurrez aurre”.
Alkate izandakoek “elkarbizitza” itsasargi izan dutela azaldu du, eta ezberdinekin akordioetara iritsi direla. “Ezker baskistak itunak egiteko duen gaitasunaren oinordeko naiz”, gaineratu du. Elorza Donostiako alkate zela bete zuen estreinakoz kargu bat Itxasok, eta hari eskertu dio “intuizio politikorako ahalmena”. Denentzako gobernatuko duela esan du, “Bilduk ez bezala”.
PSE-EEko alkate ohien eskutik makila jaso du Itxasok
