Birziklatzen duten merkatari eta ostalariek hobariak eska ditzakete
Ekainaren 30era arte egin daiteke eskakizuna; %20ra arteko hobaria lor daiteke
Birziklatzen duten merkatariek %20ko hobariak jaso ditzakete, ordenantza fiskalen arabera. Udalak jakinarazi duenez, hobariak eskatzeko epea zabaldu dute, eta ekainaren 30era arte egongo da irekita. Udaletxeko erregistro orokorrean egin beharko dute eskaria. Hala ere, San Markos Mankomunitatearen baldintzak betetzen jarraitzen baldin badute, bere horretan mantenduko dira hobariak.
Bi programa ditu mankomunitateak. Alde batetik, astean behin jasotzen dituzte papera eta kartoia, birziklatzen duten lokaletan bertan. Bestetik, beira astean bitan jasotzen dute alde zaharreko tabernetan. Udalak birziklatzera animatu ditu herritarrak. Horretarako, San Markosera deitu beharko dute —943 21 49 77— edo mankomunitatearen webgunean izena eman.
