Hauteskunde kalejira egingo du EH Bilduk larunbatean
Alkartetxean jarri dute zita 12:00etan; aste honetan ere auzoko batzarrak egingo dituzte
Hauteskundeetako kalejira antolatu du EH Bilduko auzoetako mahaiak, datorren larunbatean. 12:00etan jarri dute zita Alkartetxean, eta bertan entsegua egingo dute. Bertatik irtenda egingo dute kalejira, eta bi abesti ezaguni sortze propioko letra jarriko diote.
Lehenengo kantak Aitzol Gogorza eta beste presoen egoera jorratuko du, baita ere honako gaiak: Gure Esku Dago, Euskal Bidea eta EH Bildu bera. Bigarrena, berriz, protesta kantua izango da: Kopagoa, zorra, Juan Carlos Borboikoa, Rouco Varela, ustelkeria, troika eta Europako matxinada. Poema kantatuan, berriz, PP, PSOE eta EAJ izango dituzte hizpide. Esku orriak banatuko dituzte letrekin.
Bestalde, auzoz auzo batzarrak egiten ari da koalizio soberanista. Atzo Gaztañon egin zuten batzarra, eta bihar Iztietako anbulatorio pareko plazan elkartuko dira, 19:00etan. Datozen bilerak Beraunen eta Agustinetan izango dira. Gainera, astelehenean ekitaldi nagusia egingo dute Niessen kulturgunean, 19:00etatik aurrera. Julen Mendoza alkateak, Itziar Ostolaza zerrendako bosgarrena eta Alternatibako bozeramaile Oskar Matutek hartuko dute hitza.
EH Bilduren batzarra Gaztañon
