Omenaldiek, bazkariak eta dantzak itxiko dute 'Ateak Zabalduz'

Herriko sei jubilatu elkarteetako kideek hainbat norbanako eta erakunderi aitortza egin diete

2015/05/15

Sei erretiratuen elkarteek omendutako pertsonak

Aste honetan —hauteskunde kanpainaren baimenarekin— Errenteria-Oreretako jubilatuak izango dira protagonista. Ateak zabalduz erretiratuentzako jardunaldiak antolatu dituzte hirugarren aldiz, eta gaur dituzte iniziatiba itxiko dituzten azkeneko ekitaldiak. Eguerdian omenaldi hunkigarria egin dute, Merkatuzarren. Iker Sanchez Errenteria Musikaleko saxo ikasleak ireki —eta itxi— du ekitaldia. Ondoren, Julen Mendoza alkateak udalerriko erretiratuek duten bizipoza txalotu du, eta esan du “ezinbestekoa” dela gizartearentzako. Oskorrik edadetuei eskainitako abesti baten zatia eskaini die bertaratutako hamarnaka lagunei. Ondoren hasi da omenaldia. Erretiratuen klubeko ordezkariak igo dira banan-banan oholtzara, eta omenduak igoarazi dituzte. Honakoak dira:

Beti Bizkor (Olibet): Agustina Huici eta Ferina Gabarain. Erretiratuen elkarteari egindako ekarpena aitortu diete, batez ere Gabonetako apainketarekin.
Bienvenido (Beraun): Auzo elkartea omendu dute, eskaintzen dieten laguntzagatik.
Parque (Galtzaraborda): Emilia Prieto, “bere lan isilagatik”. Gimnasia egitean, eskulanetan, erakusketetan eta beste hainbat ekitalditan “beti presente” dagoela nabarmendu dute.
Laguntasuna (Gabierrota): Auzoko Bi-Errota elkartea zoriondu dute, beti laguntza eskaintzeagatik.
La Magdalena (Alaberga): Maria Pilar Jimenez omendu dute, elkartean mende laurden inguru daramalako. Gainera, bere urtebetetzea izanik, bertaratutako guztiek Zorionak zuri abestu diote.
San Agustin (Agustinak): Amalio Zamarron eta Casimira Miguelañezi egin diete aitortza. Azken horrek elkartearen ereserkia konposatu zuen, eta Zamarronek hainbat poesia idatzi dizkie edadetuei.

Omenaldiaren ondoren aperitifa hartzera joan dira, eta Merkatuzarrera itzuli dira bazkaltzeko —417 lagun ziren guztira—. Momentu honetan festa txikia egiten ari dira. [nggallery id=53]

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.