Bost zerrenda; 21 eserleku; aginte makila, bakarra
EH Bilduk eta Ezker Anitzak gutxiengoan gobernatu dute azken lau urteetan; indar korrelazio berria ikusteke dago
Gozokiak. Arrosak. Puxikak. Melodia errepikakorreko abestiak tu egiten dituzten bozgorailuak. Kartelak. Sotoko postontzia oporretatik bueltan baino beteagoa. Horiek eta beste gauza asko gauerdian bukatuko dira. Igandeko hauteskundeetara aurkeztu diren hautagaitzek etxeko lanak eginak beharko dituzte ordurako. Bihar hautesleek euren botoa hausnartu beharko dute, eta igandean papertxoa hautestontzietara eraman. Ala ez.
Bost hautagaitza lehiatuko dira igandean, aginte makila eskuratzeko asmoz. EH Bilduk orain arte Ezker Anitzarekin gutxiengoan gobernatu du. Lehen indarra izaten jarraitu nahi du, Julen Mendoza jarduneko alkatea buru dutela, eta “troika lokala” deitzen diotena geldiarazteko gehiengo zabala lortu nahi du, eurek bakarrik edo “eraldaketaren eredua” defendatzen duen Irabaziz-ekin. Kanpaina aktiboa egin dute, auzoz auzoko batzarrak eginez, eta astelehenean Niessen aretoa bete zuten.
PSE-EErentzako, berriz, kolpe gogorra izan zen duela lau urte Errenteriako Alkatetza galtzea. Kosta ala kosta berreskuratu nahi dute ordura arte gotorleku izan zuen udala. Profil altuko mitina egin zuten pasa den asteburuan, eta Jose Angel Rodriguez alkategaiaren irudiarekin hainbat papertxo banatu dituzte atez ate.
EAJren kanpaina diskretuagoa izan da. Ez du ekitaldi masiborik egin (ekonomiari eta beste gaiei buruzko hitzaldiak antolatu dituzte). Hori bai, alderdiaren exekutiboaren presidente Andoni Ortuzar eta Markel Olano ahaldungaia izan ziren Errenteria-Oreretan, pasa den astelehenean, Maite Peña alkategaia buru zuten militantez inguratuta. Gaur Iñigo Urkullu lehendakariak udalerria bisitatu du.
PPk kale gutxi zapaldu du, eta egun dituen bi ordezkariak mantentzea arrakasta izango litzateke eurentzat, alderdiak duen gainbehera ikusita. Chema Herzog izango da alkategaia, bigarren aldiz.
Aurten Ezker Anitza, bere horretan, ez da aurkeztuko. Irabaziz hautesle elkargoari eman dio babesa. Bertan doaz Equo eta Alternativa Republicanarekin batera. Beste udalerri batzuetan ez bezala, Ahal Dugu ere proiektuan sartu da, eta, gainera, zirkulu lokaleko idazkari nagusi Ion Collar izango da zerrendaburua. Ikusi beharko da Podemos efektuak zer nolako indarra duen. Europako hauteskundeetan, elkargoa osatzen duten zerrendek, batuta, boto kopuru polita lortu zuten.
Oarso Bidasoko Hitzak elkarrizketa egin die bost hautagaiei, gai zehatzei buruz. Hemen daude: Julen Mendoza (EH Bildu), Jose Angel Rodriguez (PSE-EE), Maite Peña (EAJ), Chema Herzog (PP) eta Ion Collar (Errenteria Irabaziz). Horrez gain, igandean egunean zehar gertatutakoa webgunean jarraitzeko aukera egongo da, emaitzak zein egunean zehar gertatutakoa. Astelehenean papereko edizio berezia egongo da.
Kartelez bete da herria, ohi bezala
