Hondakinen kudeaketan jarrera "aktiboa eta positiboa" eskatu du Eguzkik
Udalbatza berriari eskaera hori egin dio; hondakinen batzordeak lan duina egin duela uste dute
Datozen igandeko hauteskundeetatik aterako den Udalbatzari hondakinen kudeaketan “jarrera aktibo eta positiboa” edukitzeko eskatu dio Eguzkik. Bukatzear den agintaldian urratsak egin direla uste dute, baina uste dute hondakinen arazoari irtenbidea emateko pauso “ausartagoak” eman behar direla.
Eguzkiren ustez, Ingurumen Aholku Kontseiluko hondakinen taldeak “lan duina” egin du, eta hartutako hainbat erabaki begi onez ikusten dituzte. Hala ere, beste neurri batzuk “beharrezkoak” direla iritzi dute. Horrela, sistemen eztabaida alde batera utzi eta eta “emaitza eraginkorrak” izateko neurriak galdegin dituzte. “Alderdiei konfrontazio jarrera alde batera utzi, eta interes orokorra bilatzea eskatzen diegu”, esan du Eguzkik.
Orain dela hilabete erdialdeko edukiontzi bat ireki zuten hainbat erakunde ekologistetako kideek Errenteria-Oreretan, eta hango emaitzak “lotsagarriak” izan zirela uste dute. “Egoera horri buelta eman behar diogu”, gaineratu du Eguzkik, eta “orain arteko desadostasunak alde batera utzi eta egokiagoak diren birziklatzeko portzentajeak lortzeko bitarte eta baliabideak ahalik eta azkarren adostu behar ditugu”.
Hondakinen karakterizazioa egin zuen Eguzkik, beste talde batzuekin
