Euskara ikasleek, unibertsitateko udako ikastaroetan izena ematen duten lezoarrek, eta elkarte zein merkatariek eska dezakete diru laguntza.
lezoko.udala
Lezoko Udalaren Euskara sailak euskara ikasten, udako unibertsitateko euskarazko ikastaroetan izena eman nahi duten, zein errotuluak euskaraz jarri nahi dituzten elkarte, erakunde zein merkatariei diruz laguntzeko deialdia argitaratu du. Urtero ematen ditu laguntza horiek udalak, jendartean euskararen erabilera sustatu asmoz. Hiru arlotan banatu ditu diru laguntzak udalak. hala, euskaltegiko euskara ikasleek Lezoko euskaltegian edo beste edozeinetan izena eman eta gutxienez % 85eko asistentzia ziurtatu beharko dute. Derrigorrezkoa da halaber, Lezon urtebetez erroldatuta egotea.
Udako ikastaroetara joan nahi dutenentzat ere badu laguntzik udalak. Horiek UEUko edota EHUko ikastaroetan parte hartu beharko dute eta Lezon azken lau urteetan erroldatuta daudela egiaztatu beharko dute.
Errotulua euskaraz jarri
Errotulua euskaraz jartzen duten elkarte, erakunde eta markatariei ere emango die laguntza udalak. Azken horiek Lezon behar dute lokala izan, errotuluan azalduko diren testuak euskaraz egon behar dute idatzita eta zuzen. Iraila eta ekaina bitartean egindako ikastaroen kasuan uztailaren 3a arte izango dute interesdunek laguntza eskatzeko aukera. Uztaila eta abuztua bitartean egindako ikastaroen kasuan, irailaren 30a arte egin ahalko da eskaera. Unibertsitateko udako ikastaroetan aritzeko, berriz, matrikula formalizatu ostean egin beharko da eskaera.
Errotuluekin haiek jarri aurretik egitea komeni dela esan du euskara sailak, beti ere 2015 urtearen barruan.