Lehen Mailara igotzeko azken kanporaketa hasiko du etzi OKEko emakumeen taldeak. El Olivo izango dute aurrean, gol gutxi jasotzen dituen horietakoa.
Maiatzaren 24ko partidako irudia
Atotxak, Anoetak, Ipuruak, Stadium Galek, Añorgako futbol zelaiak eta herrialdeko beste askok une gogoangarriak bizi izan dituzte euren historian. Batzutan onerako, bestetan kalterako. Oiartzungo Karla Lekuona zelaian horietako une batez gozatzeko aukera izango da etzi. Oiartzun Kirol Elkartearen (OKE) emakumeen talde nagusiak El Olivo taldea (Vigo, Galizia) jasoko du, 12:00etatik aurrera, Emakumeen Lehen Mailara igotzeko azken kanporaketako joaneko partidan.
Aurreko kanporaketaren itzuliko neurketan, maiatzaren 24an, zalez goraino bete zen Oiartzungo estadioa. Bertan izan zirenek ikusi zuten nola OKEren emakumeek dena eman zuten joaneko partidako 4-2koa iraultzeko. Kostata, oiartzuarren bultzadarekin, lortu zuten aurrera ateratzea partida eta kanporaketa, 4-0 irabaziz Madrid CFF taldeari. Maiatzaren 24ko espirituak berriz ere Karla Lekuona inbaditu behar du etzi.
11:50an, jokalariak aldagelatik atera baino lehen, Jon Alkorta taldearen entrenatzaileak ziur du zer esango dien jokalariei: «Azken puntura iritsi gara. Dakiguna azaldu behar dugu zelaian, eta gertatzen dena gertatu ere, harro sentitu behar dugu orain arte egindakoarekin. Irabaztea sekulakoa izango da, baina galtzea ez da porrota izango».
Indarreko taldea
Partida ondo prestatu dute oiartzuarrek. Alkortak galiziarren bideoak ikusi ditu, badaki nola jokatzen duten. Indar handiko taldea dela esan du entrenatzaileak, «ez gu bezain teknikoa, baina indar handikoa. Taldea ondo dago, partidari aurre egiteko gogo handiarekin. Oso kanporaketa exijentea izango da». Gol gutxi jasotzen dituen taldea da Vigokoa; oiartzuarren dohain nagusiak, berriz, baloiaren jabetza edukitzea eta gol aukerak sortzea dira. Bi futbol eredu ezberdin izango dira aurrez aurre, beraz, Oiartzungo berdegunean. Baina helburua, bakarra: handienekin lehiatzeko eskubidea lortzea.
Eta igoko balitz?
Kirol alorrean bakarrik ez. Alor horretan OKEren neskek arrakasta izango balute, ez litzateke nahikoa izango Lehen Mailan jokatzeko. Aurrekontu handia eskatzen du maila horretan aritzeak, hori badakite aurretik izandako esperientziengatik oiartzuarrek.
Baina taldearen zuzendaritzako kideak mugitzen ari dira, lanean ari dira, ateak jotzen dabiltza, kirol igoera gertatuko balitz, horri aurre egiteko finantzazioa lortu nahian.
